Գալիս է մի ժամանակաշրջան, երբ կինը մայրանում է : Աշխարհ է գալիս մի նոր մարդ: Ու այս շրջանում մոր սննդակարգը երեխայի առողջության գլխավոր, կարևորագույն բաղադրյալներից է դառնում: Ներկայում այս շրջանին վերաբերող տեղեկությունները բազում են:
Ճիշտ է, հղիության շրջանում կանայք աշխատում են միայն օգտակար սննդամթերք կիրառել, սակայն, փոքրիկին կրծքով կերակրելու շրջանում պետք է հիշել նաև սննդակարգի վերաբերյալ այլ խորհուրդների մասին: Ու հոգատար մայիկն այս շրջանում որակով ու սննդարար կաթ ունենալու համար պետք է վիտամիններով ու հանքանյութերով հարուստ մթերք օգտագործի: Այսինքն, օրաբաժինը պետք է հարուստ լինի այդ նյութերը պարունակող մթերքներով:
Ծննդաբերությունից հետո շատ հարմար են ու օգտակար բանջարեղենային ապուրները, եփած մրգերն ու կաթնային շիլաները:
Յուղոտ, կծու, ապխտած ու բարձրկալորիական մթերքները, ինչպես նաև աղն ու շաքարը, կոֆեինն ու գազավորված ըմպելիքները հետծննդաբերական շրջանում պարզապես պետք է բացառել: Ցիտրուսն (նարինջ, մանդարին ու կիտրոն) ալերգիա կարող է առաջացնել: Հարկավոր է խուսափել նաև շոկոլադ ու ելակ օգտագործելուց:
Բժիշկները կարծում են, որ պետք է առժամանակ կաթ չօգտագործել, որը երեխայի մոտ փորացավի պատճառ կարող է դառնալ: Դրա փոխարեն հարմար է կաթնաշոռը, կեֆիրը կամ էլ փափուկ պանիրը:
Թվում է, թե, շատ խիստ սահմանափակումներ են, սակայն եթե հետևեք առաջարկվող ցուցակին ապա կհամոզվեք, որ ամեն ինչ այնքան էլ բարդ չէ:
Կրծքով կերակրելու շրջանում կարելի է օգտագործել.
-շոգեխաշած ցանկացած բանջարեղեն
— ձեր սիրած մրգերը (բացառությամբ ցիտրուսների)
-չափավոր քանակով օրգանիզմին նաև հաց է անհրաժեշտ
-հատիկավորներից պատրաստած շիլաներ
-ինչպես նաև` ցանկացած ոչ յուղոտ մսատեսակ:
Եթե նորաթուխ մայրիկն առողջական խնդիրներ չունի, ապա կարող է նաև մի քիչ կաղամբ օգտագործել, ինչպես նաև հատիկավորներ , արևածաղիկ ու ձու: Սակայն, ամեն նոր սննդամթերքի հետ ուշադրություն դարձրեք փոքրիկի ռեակցիային ու ալերգիայի նշաններ հայտնաբերելու դեպքում անմիջապես դադարեք այդ մթերքն օգտագործելուց:
Իսկ որպեսզի ձեր սննդակարգը օգուտ տա և ձեզ և փոքրիկին, ապա կարող եք օրագրում գրառել, թե , որ սննդամթերքն է բարերար ազդել թե ձեզ և թե երեխայի վրա:
