Գուցե ես լինեի, այսպիսի վճիռ չլիներ. Նազենի Ղարիբյան

Երեկ գրել էինք, որ Օպերայի  եւ բալետի ազգային ակադեմիական թատրոնի նախկին տնօրեն եւ գեղարվեստական ղեկավար Կոնստանտին Օրբելյանը  երկու հայցով եւ մի քանի պահանջով դիմել էր դատարան: Նախ`քաղաքացիական պահանջով, արդեն նախկին մշակույթի նախարարի պարտականությունները կատարող Նազենի Ղարիբյանի հրամանը անվավեր ճանաչել, այն հրամանը, որով Կոնստանտին Օրբելյանը աշխատանքից ազատվել էր: Ինչպես նաեւ պարապուրդի գումարի վճարումը եւ, բնականաբար, աշխատանքի վերականգնելը`թատրոնի տնօրենի պաշտոնում:

Դատարանն ամբողջությամբ բավարարել է Օրբելյանի հայցը: Araratnews.am-ը զանգահարեց մշակույթի նախարարի պարտականությունները կատարած Նազենի Ղարիբյանին՝ պարզաբանում լսելու:

Տիկի՛ն Ղարիբյան, դատարանի վճիռը սպասելի՞ էր Ձեզ համար:

Եվ այո, եւ ոչ: Դատական որոշումների համար երբեք 100 տոկոսով վստահ չեք, քանի դեռ դատավճիռը չի կայացել: Ամեն դեպքում իմ դիրքորոշումը հետեւյալն է՝ մենք կատարել ենք մի գործընթաց, մի որոշում ենք կայացրել… ես այն երկնքից չեմ կայացրել: Այն հիմնված է իրավաբանների խոսքի վրա: Դատավարության ընթացքն ու արդյունքը կախված է դատավարության կողմերից, ինչպես են նրանք  ներկայացնում իրենց տեսակետը: Ես չեմ հետեւել դատական գործընթացին: Չգիտեմ՝ ինչ հիմքով են նման վճիռ կայացրել, չնայած մոտավոր պատկերացնում եմ: Ինձ համար նորմալ է այս վճիռը, քանի որ ես անձնական որեւէ շահագրգռվածություն չունեմ, չեմ հետապնդում Կոնստանտին Օրբելյանին: Դա նախարարության գործն էր, պետք է իրավաբաններ ուղարկեին,  իրավաբանության բաժինը պետք է պատրաստվեր: Ի վերջո, այդ  Օրբելյանին թատրոնի տնօրենից ազատելու որոշումը կայացրել է նախարարի պաշտոնակատարի պարտականությունները կատարող Նազենի Ղարիբյանը:

Ըստ Ձեզ՝ Կրթության, գիտության, սպորտի եւ մշակույթի  նախարարությունը պետք է բողոքարկի՞ այս վճիռը վերաքննիչ դատարան:

Ես չգիտեմ: Դա կախված է նախարարությունից:

Եթե դուք լինեիք նախարար, կբողոքարկեի՞ք:

Չեմ կարող ասել: Գուցե ես լինեի, այսպիսի վճիռ չլիներ: Կա նաև օբյեկտիվ հանգամանք: Դատական գործընթացը սկսվեց նախարարությունների միացման փուլում։ Շատ խառը, բարդ  իրավիճակ էր: Շատ խնդիրներ գուցե բավարար ուշադրության չեն արժանացել: Նախարարությունը պետք է որոշի, թե ինչ է անելու: Ամեն դեպքում մի բան հստակ է՝ ՊՈԱԿ-ի տնօրենը չի կարող զբաղեցնել  գեղարվեստական ղեկավարի պաշտոնը: Դա օրենքն է պնդում: Հիմա ինչ հիմքով են վերականգնել… գուցե այն հիմքով են վերականգնել, որ Օրբելյանին հրավիրել են Հայաստան, եւ նա չի իմացել, որ այդպես է: Հետևաբար, նրա մեղքը չէ, այլ նախկին իշխանության մեղքով է, որ օրենք է խախտել: Չեմ կարող հստակ ասել եւ խորանալ ենթադրություններ անել:

Օրբելյանի համակիրները կարծում են, որ  Նազենի Ղարիբյանի «թեթեւ» ձեռքով Օպերային թատրոնը պետք է Օրբելյանին  վճարի պարապուրդի գումարը՝ 470 հազար  դրամ: Նորից, ըստ ընդդիմախոսների, ականատես եղանք իշխանության անհիմն որոշման: Ձեր կարծիքը սրա մասին:

Այդ պարապուրդի գումարը օպերային թատրոնն ունի, քանի որ նրա բյուջեն տարեկան 1 միլիարդ 400 մլն դրամ է, որն ավելի է նախարարության ամբողջ տարվա բյուջեից: Իսկ այդ գումարը տալիս են հարկատուները: Ուրեմն՝ ես ինձ հավասարաչափ պատասխանատու էի զգում, հետևաբար դա «թեթեւ ձեռքով» արված որոշում չէ:

Ըստ Ձեզ՝ վարչապետ Նիկոլ Փաշինյանն ինչ հետեւություն պետք է անի դատական այս վճռից: Նրա հետ քննարկե՞լ էիք իրավական հետագա գործընթացը:

Կարող եմ ասել՝ վարչապետը տեղյակ էր, որ այդպիսի որոշում պետք է  կայացնեի՝ Օրբելյանին ազատել թատրոնի տնօրենի պաշտոնից:

Այսինքն՝ Ձեզ մեղավոր չե՞ք համարում:

Բոլորովին: Ինչո՞ւ պետք է մեղավոր համարեմ: Գործել եմ՝ ըստ օրենքի եւ իմ պաշտոնավարման: Այստեղ սխալի կամ ճշտի հարց չկա: Դատական պրոցեսն ու արդարությունը կարող են երբեմն չհամընկնել:

Սոնա Դավթյան