Ինչպես արդեն տեղեկացրել էինք, մարտի 25-ին Գյումրիում արտակարգ դեպք էր տեղի ունեցել: Վաղ առավոտյան 2 դիմակավորված անձինք Գյումրի քաղաքում իր տան՝ Վազգեն Սարգսյան 1-ին նրբանցքի թիվ 4 հասցեից աշխատանքի գնալու ժամանակ դանակի մի քանի հարվածներ էին հասցրել Գյումրիի թիվ 3 ընտանեկան բժշկական կենտրոնի տնօրեն Արտուշ Ասատրյանին: Վերջինս տեղափոխվել էր Գյումրու բժշկական կենտրոն: Այսօր կենտրոնի մամուլի խոսնակ Նարեկ Կիրակոսյանը Araratnews.am-ին հայտնեց, որ բժիշկ Արտուշ Ասատրյանը հիվանդանոցից դուրս է գրվել: Կիրակոսյանի փոխանցմամբ, ընտանեկան բժիշկը երեկ է դուրս գրվել: Դանակահարված բժշկի առողջական վիճակը բավարար է գնահատվել, կյանքին վտանգ չի սպառնում: Միևնույն ժամանակ, Բժշկական կենտրոնից հայտնեցին, որ բժիշկ Արտուշ Ասատրյանը մի քանի օր բուժումը կշարունակի ամբուլատոր պայմաններում:
Նշենք, որ կատարվածի առնչությամբ հարուցվել է քրեական գործ: Նախաքննությունը շարունակվում է:
