Օրեր առաջ անդրադարձել էինք Պետական վերահսկողական ծառայության՝ «Սևանի իշխանի պաշարների վերականգնման և ձկնաբուծության զարգացման» հիմնադրամում 3 միլիարդ դրամի չարաշահմանը:
Araratnews.am-ին նոր տեղեկություններ են հասել ՊՎԾ-ի այս բացահայտումից: Ուսումնասիրությունը 70 էջ է: Հայտարարության մեջ նշված ուկրաինական ընկերությունը, որի անունը, նախաքննության հանգամանքները հաշվի առնելով, չի հրապարակվել, Ուկրաինայում բավական հայտնի է, չի ցանկանում մատակարարել կատամարանը, որի համար պետությունը հիմնադրամի միջոցով նախօրոք վճարել է 234 միլիոն դրամ: Հիմնադրամը ապրանքի մատակարարման պայմանագիր կնքելու փոխարեն կապալի պայմանագիր է կնքել, վճարումները նախապես կատարել, նույնիսկ 55 մլն դրամ էլ ավելի վճարել ուկրաինական ընկերությանը: Թե ինչու են այդպես արել, որեւէ բացատրություն պատասխանատուները չեն տվել:
Բացի ուկրաինական ընկերությունից, մասնավոր շատ ընկերություններ եւս առնչվել են հիմնադրամին, որոնց անունները նախաքննության ավարտից եւ մեղադրանքի հաստատումից հետո գուցե հրապարակվի: Ավելին՝ կան ընկերություններ, որոնք ուսումնասիրության ենթակա 3 տարիների ընթացքում միայն մեկ գործարք են արել և միայն վերոնշյալ հիմնադրամի հետ:
Ուսումնասիրության ժամանակ բացահայտվել է նաև այն, որ գնումներն արվել են մեկ անձից: Օրենքը, իհարկե, դա չի արգելում, բայց դարձյալ առնչվում ենք խնդրի բարոյական կողմին՝ կարող էին հարցում անել տարբեր ընկերությունների եւ գտնել ամենացածր արժեքը:
Մի ուշագրավ տեղեկություն եւս՝ ըստ մեր աղբյուրների։ Չի բացառվում՝ սույն գործում ներգրավվեն նաև ձկնաբուծարան ունեցող նախկին մի շարք բարձրաստիճան պաշտոնյաներ։ Բանն այն է, որ հիմնադրամը պետք է վերականգներ Սեւանի իշխանի պաշարները, բայց Սեւանի ավազան լցվելու փոխարեն լցվել են նախկին օլիգարխների մասնավոր ձկնաբուծարանները:
Մեկ եզրահանգում եւս: Պետությունը պիտի նաև եկամուտ ստանար հիմնադրամի գործունեությունից մոտավորապես 30 միլիոն դրամի չափով, բայց չի ստացել:
Հիշեցնենք՝ ՊՎԾ-ն այս ուսումնասիրությունն ուղարկել է ՀՀ գլխավոր դատախազություն: Այնպես որ, ինչպես ժողովուրդն է ասում, այս խմորը դեռ շատ ջուր կքաշի: Պարզապես զարմանալի է, որ այսքանից հետո հիմնադրամի գործադիր տնօրեն Վարդան Մամիկոնյանը, որը 2016 թվից աշխատում է հիմնադրամում, պնդում է՝ ՊՎԾ-ի հայտնաբերածը ոչ թե խախտում, այլ ընդամենը կասկած է, գողություն էլ չի եղել:
Սոնա Դավթյան
