«Քաղաքացիական պայմանագիր» կուսակցության անդամ, ԱԺ «Իմ քայլը» խմբակցության պատգամավոր Սասուն Միքայելյանը երեկ մանրամասներ ներկայացրեց Աբովյանի քաղաքապետի ընտրության, Կոտայքի մարզպետ Ռոմանոս Պետրոսյանի գործունեության մասին: Նա մեղադրեց Կոտայքի մարզպետ Ռոմանոս Պետրոսյանին՝ Աբովյանում ՔՊ թեկնածու Գրիգոր Գուլյանի պարտության համար:
Կոտայքի մարզպետն արձագանքեց՝ ասելով, «ազնիվ չես նախ ինքդ քո հանդեպ և քո իսկ անցած ուղու, ապա նաև՝ իմ նկատմամբ»:
Araratnews.am-ը «Քաղաքացիական պայմանագիր» կուսակցության վարչության անդամ Վիլեն Գաբրիելյանից՝ Նավակ Ճոճողից, հետաքրքրվեց՝ համամի՞տ է Սասուն Միքայելյանի հայտարարությանը: «Գիտեք՝ չեմ ցանկանում մեկնաբանել նրա հայտարարությունը»,- ասաց Վիլեն Գաբրիելյանը:
— Մտավախություն չունե՞ք, որ Սասուն Միքայելյանի՝ «եթե դասեր չքաղենք, էս թավշյա հեղափոխությունը մեր կողմից կդառնա թավշյա հեռացում» կանխատեսումն իրականություն կդառնա:
— Ես Սասուն Միքայելյանին մեծագույն հարգանքով եմ վերաբերվում: Եթե մի բան ասում է՝ ուրեմն մի բան գիտի: Ես ոչ մի ձեւի չեմ ուզում մեկնաբանեմ ո՛չ Սասուն Միքայելյանի, ո՛չ Ռոմանոս Պետրոսյանի հակասությունները: Հակասություն կա, պիտի խոսացվի, լուծվի:
— Իսկ համաձա՞յն եք Սասուն Միքայելյանի հայտարարություններին:
— Ո՞ր հայտարարություններին:
— Օրինակ՝ խմորումների, ինտրիգների մասին խոսեց: Բացի Սասուն Միքայելյանից, լուրեր կան, որ իշխող «Քաղաքացիական պայմանագիր» կուսակցությունում թեւեր կան:
— Չեմ կարծում՝ նման բան կա, բայց չեմ բացառում ոչինչ:
— Սասուն Միքայելյանը հայտարարեց՝ Աբովյանի քաղաքապետը լավ է աշխատել: Համամի՞տ եք:
— Ես չեմ ճանաչում քաղաքապետին, բայց եթե անկուսակցական է եղել, գուցե լավ է աշխատել: Սակայն հրապարակումներ են եղել, որ կարծես թե այնքան էլ լավ չի աշխատել: Ինչ-որ մի տեղ վատ է աշխատել:
— Համաձա՞յն եք, որ Կոտայքի մարզպետ Ռոմանոս Պետրոսյանի պատճառով ձեր կուսակցությունն Աբովյանում պարտվեց, ինչպես հայտարարեց Սասուն Միքայելյանը:
— Չեմ կարծում: Մեզանից յուրաքանչյուրը, կարծում եմ, իր բաժին մեղավորությունն ունի:
— Կհիշեք՝ Աբովյանում ընտրություններից առաջ ՔՊ շտաբի պետի մեքենան էին այրել: Միքայելյանը հետաքրքիր ակնարկ արեց՝ պետք է պարզել՝ այդ մեքենան այրեցի՞ն, թե՞ այրեց: Կարծես թե ակնարկում էր՝ այրելու հրահանգը եղել է ՔՊ-ից:
— Իրավապահ մարմինները պետք է այդ գործը բացահայտեն:
— Բայց ձեր թիմը նման հրահանգ կարո՞ղ էր տալ:
— Ո՛չ, ըստ իս: Ես նման բան բացառում եմ:
Սոնա Դավթյան
