Նոր ուսումնական տարվան ոչ բոլոր ընտանիքները կարող են պատշաճ պատրաստվել: Ոչ բոլոր ծնողներն են կարողանում գնել գրենական պիտույքներ ու աշակերտական հագուստ: Այս ամենի պատճառով ծնողներից ոմանք հրաժարվում են իրենց երեխաներին դպրոց ուղարկելուց: Օրեր առաջ ԿԳ նախարարության հանրակրթության վարչության պետ Աշոտ Արշակյանը հայտարարել է՝ երեխաներին դպրոց չուղարկող ծնողները կարող են տուգանվել 30 հազար դրամով:
«Բազմազավակ մայրերի աջակցության միավորում» ՀԿ նախագահ Մարգարիտա Հովսեփյանից Araratnews.am-ը հետաքրքրվեց՝ արդյոք այդ օրենքը կյանքի կկոչվի՞, եթե դպրոց չուղարկելու պատճառը հիմնականում սոցիալական է: Նրա կարծիքով՝ դպրոց չհաճախելու համար տուգանքի մասին օրենքը չի գործում: «Պետք է խիստ մոտեցում դրսեւորել այն ծնողների հանդեպ, որոնք իրենց երեխաներին դպրոց չեն տանում: Անհրաժեշտ է լծակ տալ գյուղապետներին, այն կառույցներին, որ այդպիսի ընտանիքներին պահեն ուշադրության կենտրոնում»,- ասաց զրուցակիցս:
Եթե ծնողը գումար չունի գրենական պիտույքների, դասագրքերի համար վճարելու, արդարացի՞ է նրան տուգանել: «Կան ընտանիքներ, որոնց հատուկ ծրագրերով տալիս են դպրոցական պարագաներ»,- ասաց Մարգարիտա Հովսեփյանը:
«Բազմազավակ մայրերի աջակցության միավորում» ՀԿ նախագահին մտահոգում է, որ կան ընտանիքներ, որոնք անտարբեր են իրենց երեխաների կրթության հանդեպ. «Որպես արդարացում ասում են՝ կրթվածներն ինչի՞ են հասել»:
Կառավարությունը մշտապես խոսում է բազմազավակ ընտանիքներին աջակցելու մասին, իսկ արդյոք պետությունը բավարար քայլեր ձեռնարկո՞ւմ է՝ աջակցելու բազմազավակ ընտանիքներին եւ ընդհանրապես ծնելիության աճին: «Պետք է ավելի լուրջ քայլեր անել՝ բազմազավակ ընտանիքներին աջակցելու»,- ասաց Մարգարիտա Հովսեփյանը:
Մանրամասները՝ տեսանյութում:
ՍՈՆԱ ԴԱՎԹՅԱՆ
