Ֆեյսբուքյան օգտատերերը զգուշացնում են, որ Երևան քաղաքում մի մարդ, ով իրեն ձևացնում է որպես մուրացկան, գյուղերից շներ է գողանում, բերում մայրաքաղաք ու 2000-5000 դրամով վաճառում:
Մասնավորապես, օգտատերերից մեկն ահազանգում է, որ վերը նշված մարդուն տեսել է Հրապարակում, փորձել է շներից մեկին օգնություն ցույց տալ ու վերցնել, դրա դիմաց 2000 դրամ է առաջարկել, սակայն նա ավելին է ուզել. «Հետո 50 հազար ուզեց, տեսավ, որ այդքան հաստատ չենք տա, 5000 հազար դրամ ուզեց, բայց դա էլ չտվեցինք ու նստեցինք տաքսի, որ գնանք, նա էլ մի ուրիշ տաքսիով սկսեց հետևել մեզ, ու որոշեցինք այլ ճանապարհներով գնալ»,- «Իմ շունը» ֆեյսբուքյան խմբում գրում է օգտատերը:
Գրառման մեջ նաև նշվում է, որ մուրացկանը շունը գողացել է Գյումրիից, ու չնայած իրեն չքավորի պես է պահում, բայց ապացույցներ կան, որ իրականում բավականին նորմալ պայմաններում է ապրում. «Անունը Մայիս է, նորմալ է ապրում, հագնվում: Գյուղերում իրեն լավ են ճանաչում, գալիս է Երևան, մարդկանց հիմարեցնում ու շների միջոցով փող կորզում: Ասեմ, որ շներին օղի է խմեցնում, որպեսզի շշմեն ու չկարողանան տեղաշարժվել, պահում է «չամադանի» մեջ և այդպես փակ վիճակում տեղափոխում»:
Ֆեյսբուքյան օգտատերը նաև դիմելով քաղաքացիներին, հորդորում է նրանից զգուշանալ. «Մարդիկ անցնում են, խղճում են, փող են տալիս, մենք իրեն աշխատանք ենք առաջարկել, բայց հրաժարվել է, ասել է, որ օրը 15 հազար դրամ աշխատում է շներով, իսկ առանց շների` 5 հազար, ու իրեն աշխատել պետք չի»:
Ուշագրավ է, որ մարդն իրեն մուրացկան ու չքավոր է ներկայացնում, սակայն կարողացել է տաքսի նստել ու հետևել:
Նա նաև անմարդկային վերաբերմունք է ցույց տալիս կենդանիների նկատմամբ՝ նրանց ալկոհոլ խմեցնելով ու փակ ճամպրուկով տեղափոխելով:
Ընդգծենք, որ ինչպես տեղեկացնում է օգտատերը, ինքը դիմել է նաև ոստիկանություն, սակայն այնտեղից տեղեկացրել են, որ շները մարդու սեփականությունն են, և իրենք իրավասու չեն որևէ բան անել:
