Եվրամիությանը Թուրքիայի անդամակցության բանակցությունները դեռեւս շատ ժամանակ են պահանջում, Հյուսիսային Կիպրոսի կարգավիճակի հարցը դեռեւս լուծված չէ: Այս մասին Berliner Zeitung պարբերականին տված հարցազրույցում հայտարարել է Գերմանիայի կանցլեր Անգելա Մերկելը:
«Թուրքիան ԵՄ-ի անդամության թեկնածու-երկիր է: Անդամակցության շուրջ բանակցություններն ընթանում են անորոշ արդյունքներով: Մենք հեռու ենք բանակցությունների նշանակալի փուլերի ավարտից: Օրինակ՝ լուծված չէ Կիպրոսի հարցը: Այս ամենի համար դեռ երկար ժամանակ կպահանջվի»,- ասել է Մերկելը:
Ըստ ՌԻԱ Նովոստիի, Մերկելը, միաժամանակ, արդարացի է համարում Թուրքիային 6 մլն եվրոյի չափով գումարի տրամադրումը՝ փախստականների հետ կապված աշխատանքի համար:
«Շուրջ 70 մլն բնակչություն ունեցող Թուրքիան 2.7 մլն փախստականի է ընդունել Սիրիայից, բացի այդ, նաեւ բազմաթիվ իրաքցիների եւ աֆղանցիների: Եթե մենք՝ 500 մլն-անոց եվրոպացիներս, աջակենք Թուրքիային 6 մլն եվրոյի չափով, շահերի արդարացի հավասարակշռություն կլինի»,- ասել է Մերկելը:
