«Ելք» խմբակցության պատգամավորներ Էդմոն Մարուքյանը, Նիկոլ Փաշինյանը, Արարատ Միրզոյանը, Գեւորգ Գորգիսյանն ու Արտակ Զեյնալյանը կառավարության էին ներկայացրել «Շահումային խաղերի, ինտերնետ շահումով խաղերի և խաղատների մասին» Հայաստանի Հանրապետության օրենքում լրացումներ կատարելու մասին» Հայաստանի Հանրապետության օրենքի նախագծի վերաբերյալ Հայաստանի Հանրապետության Կառավարության առաջարկությունների նախագիծ:
Կառավարության այսօրվա նիստում հարցի զեկուցող ֆինանսների նախարար Վարդան Արամյանն ասաց, որ գաղափարն ընդունելի է: Պատգամավորներն առաջարկում են շահումով խաղեր կազմակերպողներին անձ հաստատող փաստաթուղթ պահանջել մտնողներից: «Մենք այսօր այդ կարգավորումն ունենք: Խստագույնս հետեւում ենք, որ 21 տարեկանից ցածր անձը չմտնի խաղասրահ»:
Նախարարի խոսքով՝ պատգամավորների նախագիծն ընդհանուր առմամբ ընդունելի է, բայց որոշ դրույթներ պետք է քննարկվեն՝ նախագիծը պատշաճ տեսքի բերելու համար:
Կարեն Կարապետյանը Վարդան Արամյանին հարցրեց. «Ճի՞շտ եմ հասկանում, որ կառավարության ձեւակերպումների խնդիր կա»:
«Այո, պարոն վարչապետ, խնդրում ենք հաստատել»,- պատասխանեց ֆինանսների նախարարը:
Սոնա Դավթյան
