Ավագանու ընտրություններին «Ելք» դաշինքի ցուցակով մասնակցում եմ այն գաղափարով, որովհետև «Ելքը» շատ հաղթական շանսեր ունի այս ընտրությունների ժամանակ: Այս մասին այսօր լրագրողների հետ հանդիպմանը նշեց Երևանի ավագանու «Բարև, Երևան» խմբակցության անդամ, ավագանու ընտրություններում «Ելք» դաշինքի ցուցակով առաջադրված Անահիտ Բախշյանը. «Թիմը երիտասարդ է, աշխատող, բանիմաց, և հաճույք է իրենց հետ աշխատելը: Ես արդեն իրենց հետ 4-5 օր է՝ աշխատում եմ, և յուրաքանչյուր հանձնարարություն, որ դրվում է Նիկոլի կողմից, բոլորս անում ենք: Եվ այսօր աշխատում ենք մեր ծրագրի վրա»:
Իսկ դաշինքի ծրագիրը լինելու է այնպիսին, որի շրջանակներում հնարավոր կլինի լուծել երևանցիների խնդիրները. «Ծրագիրը բարձրացնելու է խնդիրները և առաջարկելու է այդ խնդիրների լուծման հնարավոր ճանապարհները: Միակ մտահոգությունս այն է, որ երիտասարդները դեռ տնտեսություն կառավարելու փորձ չունեն, բայց իրենք տեսականորեն տիրապետում են շատ-շատ խնդիրների, հուսամ՝ ընթացքում նրանց այդ ձգտումը հմտություն կդառնա, հավատում եմ իրենց: Դե, ես էլ իրենց հետ իմ փորձով, նաև՝ մանկավարժի, աշխատելու եմ և շատ սիրով եմ դա անում»:
Անահիտ Բախշյանը հույս հայտնեց, որ Երևանի ավագանու գործունեությունն այս ընտրություններից հետո արմատապես կփոխվի. «Կփոխվի Երևանի ավագանու դեմքը, և հասարակությունը կտեսնի ու կհասկանա, թե որքան կարևոր մարմին է դա: Նաև երևանցին պետք է կարողանա մասնակցել իրեն վերաբերող ցանկացած որոշման: Նման կետ հիմա էլ կա, բայց երևի ոչ ոք չգիտի դրա մասին: Շատ պարտաճանաչորեն անցած չորս տարիներին Երևանի զարգացման ծրագիրը, բյուջեն դրվում է կյանքում, և հրավիրվում է երևանցիներին քննարկման, բայց, կարելի է ասել՝ զրո արձագանք… այս ուղղությամբ էլ պետք է աշխատանք տանենք: Եվ ես կարծում եմ, որ ի դեմս «Ելքի», նոր ավագանին արմատապես տարբերվելու է իր գործունեությամբ, և օրենքի տված յուրաքանչյուր հնարավորություն, որտեղ բնակիչների մասնակցությունը, կամքը, ցանկությունը պետք է հաշվի առնվեն, կլինի «Ելքի» շնորհիվ»:
Ինչ վերաբերում է հարցին, թե ինչու է նորից որոշել Երևանի ավագանու անդամ լինել, Բախշյանը պատասխանեց՝ որովհետև դեռ կիսատ թողած գործեր ունի, չնայած անցած տարիներին քաղաքապետարանում եղել է երևանցիների «լրտեսը» և լիարժեք իրականացրել է իր «լրտեսությունը». «Ես քաղաքացիներից ստացել եմ 853 նամակ, տարբեր խնդիրներով մոտ 900 նամակ ինքս եմ գրել, և արդյունքում 243 խնդրի մասին ենք բարձրաձայնել, որոնց 30 տոկոսը լուծվել է: Եվ հիմա նորից ցանկանում եմ դառնալ ավագանու անդամ, որովհետև նախորդ տարիներից դեռ կիսատ գործեր ունեմ թողած»:
Իսկ թե ինչու հենց «Ելքով», Անահիտ Բախշյանն ընդգծեց. «Բա հո Հանրապետական չէի՞ գնալու… Ես «Ելքից» ունեի առաջարկ նաև խորհրդարանական ընտրություններից առաջ, բայց այն ժամանակ էդպես որոշեցի, հիմա շտկում եմ, ես սիրում եմ երիտասարդների հետ աշխատել»:
«Երկիր ծիրանի»-ում էլ լինելու մասին չի մտածել, որովհետև «Զարուհի Փոստանջյանի բոլոր քայլերին, որոնք տանում էին նոր կուսակցության ստեղծմանը, մասնակից չեմ եղել, անհաղորդ եմ եղել: Նա ասում էր, որ ես իրեն հակառակ՝ բծախնդիր չեմ»:
Բախշյանը Նիկոլ Փաշինյանի շանսերն ավագանու ընտրություններում բարձր է գնահատում. «Նա շատ աշխատասեր է ու կպչուն միտք ունի, մի բանի վրա որ սևեռվում է, գնում է այդ ուղղությամբ, նույնն էլ՝ Զարուհին, և ես հարգում են նրանց»:
էմմա Հովսեփյան
