Թերթերից մեկը գրել էր, որ հոգեբուժարանների օպտիմալացման որոշումից հետո Նուբարաշենի հոգեբուժարանի բժիշկները հիվանդների հարազատներից գումար են պահանջում, ասելով, թե այժմ նոր կարգ է գործում. կա՛մ պետք է իրենց հիվանդին տուն տանեն, կա՛մ ամեն ամիս 120 հազար դրամ վճարեն` նրան հոգեբուժարանում պահելու համար: Araratnews.am-ը կապ հաստատեց Նուբարաշենի հոգեբուժարանի տնօրեն Գագիկ Միրիջանյանի հետ՝ մեկնաբանություն ստանալու: Տնօրենը հերքեց այդ տեղեկությունները, ապա հիշեցրեց՝ հոգեբուժարանում վճարովի ծառայություններ եղել են ու կան, օրինակ` առանձին հիվանդասենյակում մնալը վճարովի է: «Բայց դա 120 հազար դրամի չի հասնում: Բժիշկներն էլ չեն կարող հիվանդի հետ կոնտակտի մեջ մտնել՝ գումար գանձելու համար»,- ասաց պրն Միրիջանյանը:
Ըստ օրենքի՝ հիվանդը հոգեբուժարանում կարող է մնալ 24-36 օր սուր դեպքերի ժամանակ, սակայն եթե հիվանդի վիճակը չի բարելավվում, հիվանդի մնալը հոգեբուժարանում կախված է նրա առողջական վիճակից:
Եթե հարազատները ցանկանում են, որ հիվանդը սահմանված ժամկետից երկար մնա հոգեբուժարանում, Միրիջանյանի խոսքով՝ ստեղծվում է հանձնաժողով, որն էլ որոշում է՝ հիվանդը պե՞տք է մնա հոգեբուժարանում, թե՞ ոչ:
Քիչ չեն դեպքերը, երբ դատական գործընթացում եւ դատարանի վճռով մեղադրյալը անմեղսունակ է ճանաչվում, իսկ մեղադրյալի խնամակալը հրաժարվում է նրանից: Այս իրավիճակում կարո՞ղ է անմեղսունակ ճանաչվածը մնալ հոգեբուժարանում մինչեւ կյանքի վերջ: Գագիկ Միրիջանյանի պարզաբանմամբ` խնամակալը կարող է ինչ-ինչ հանգամանքների պատճառով ասել, որ իր հարազատը պետք է մնա հոգեբուժարանում: Բայց դա դատահոգեբուժական ստացիոնար միջգերատեսչական հանձնաժողովն է որոշում: «Անմեղսունակ ճանաչվելուց հետո մեղադրյալը հարկադիր բուժման է ուղարկվում հոգեբուժարան 6 ամսով: Դրանից հետո հանձնաժողովը, հիվանդի վիճակը հաշվի առնելով, դիմում է դատարան անմեղսունակության վերանայման պահանջով: Եթե դատարանը բավարարում է հանձնաժողովի պահանջը, նա պատիժը կրում է բաց ռեժիմով»,- մանրամասնեց բուժհաստատության ղեկավարը:
Իսկ եթե անմեղսունակ է ճանաչվում մինչ դատական վճռի հրապարակումը, հոգեբուժարանում կամ բանտախցում մեղադրյալի մնալը դատահոգեբուժական ստացիոնար հանձնաժողովն է որոշում՝ կախված իրավիճակից:
Բուժհաստատության ղեկավարը նաև տեղեկացրեց, որ պատկան մարմինները քննարկում են մի նոր առաջարկ. «Այն հիվանդները, որոնք երկար ժամանակով պետք է բուժում ստանան հոգեբուժարանում, կարող են վճարել ոչ բուժական ծառայությունների, օրինակ, ատամի մածուկի, տակդիրի համար: Մի քանի հիվանդի հարազատների հետ խոսել ենք այդ մասին, նրանք դրական են արձագանքել: Բայց սրա մասին դեռ վաղ է խոսել, որովհետեւ գերատեսչությունները դեռ քննարկում են սա»:
Հոգեկան առողջության խնդիրներ ունեցողների շահերի ներկայացուցիչ, «Հոգեկան առողջության վերականգնման հայկական ասոցիացիա» ՀԿ-ի ղեկավար Կարինե Թուխիկյանը վերջերս ասել էր, որ Նոր Նորքի հոգեբուժարանի միացումը Նուբարաշենին չի բխում հիվանդների ու նրանց հարազատների շահերից: Նրանց համար դժվար կլինի հասնել Նուբարաշեն: Գագիկ Միրիջանյանը համաձայն չէ այդ կարծիքին: «Շուտով մեքենա ենք ձեռք բերելու, որով ինչ-որ ժամերի հիվանդների հարազատներին անվճար կհասցնեն Նուբարաշեն»,- մանրամասնեց Նուբարաշենի հոգեբուժարանի տնօրենը:
ՍՈՆԱ ԴԱՎԹՅԱՆ
