Մայիսի 14-ին կայանալիք Երևանի ավագանու ընտրություններումՀայաստանի հանրապետական կուսակցությունը կստանա ընտրողների ձայների 67 տոկոսը, «Ելք» դաշինքը՝ 21 տոկոսը, «Երկիր ծիրանի» կուսակցությունը՝ 12 տոկոսը: Այս մասին այսօր հրավիրված մամուլի ասուլիսի ժամանակ ասել է սոցիոլոգ Ահարոն Ադիբեկյանը՝ ներկայացնելով ապրիլի 30-31-ը «Սոցիոմետր» ընկերության կողմից անցկացված հարցման արդյունքները:
Araratnews.am-ի հետ զրույցում ԵԼՔ դաշինքի ավագանու թեկնածու Զարուհի Բաթոյանը նշեց, թե ներկայացված տվյալները արժանահավատ չեն: «Ես որպես սոցիոլոգ չեմ կարող ասել, բայց ակնհայտ է, որ արժանահավատ չեն, բայց ձեր կողմից նշված կենտրոնի հարցումները եւ նրանցում ներկայացված արդյունքները վստահություն չեն ներշնչում: Գիտենք, որ դրանց հավատալ չի կարելի, քանի որ այդ հարցումները շատ հաճախ ներկայացվում են պարզապես կարծիք ձեւավորելու համար»,- ասաց Բաթոյանը: Բացի այդ, նրա խոսքով` հետազոտական կենտրոններ ներկայացնում են այս կամ այն թիվը, որոնք լուսաբանվում են իշխանամետ ԶԼՄ-ների կողմից, եւ պարզ է, թե որն է դրա նպատակը:
Միեւնույն ժամանակ ԵԼՔ դաշինքի ներկայացուցիչը ուշադրությունը հրավիրեց սոցիալական ցանցերում եւ տարբեր ԶԼՄ-ներում իրականացվող հարցումներին եւ դրանց արդյունքներին: «Այդ կայքերի տրամադրած հետազոտության արդյունքները այլ բան են ասում, եւ զգալիորեն մեծ տարբերություն կա ԵԼՔ-ի եւ ՀՀԿ-ի միջեւ, եւ տեսնում ենք, որ ԵԼՔ-ը ավելի մեծ վստահություն է ներշնչում»,- ասաց Զ. Բաթոյանը:
Անդրադառնալով ընթացող քարոզարշավին` Ահարոն Ադիբեկյանն ասել էր. «Զարուհին ունի կիսակուսական ձայն, նրա ձայնի տեմբրը վատն է, դրա համար էլ հավատ չի ներշնչում: Կնոջ ամենահմայիչ հատկությունը ձայնն է, իսկ Զարուհին գալիս ու ասում է, թե իրենք հաղթելու են, բայց հաղթական ձայն չեմ տեսնում: Կամ էլ` դուք կհավատա՞ք մեկին, ով ռուպորով տանիքներն է բարձրանում ու ասում, թե շուտով ամեն ինչ կփոխվի երկրում. Նիկոլի ձայնն էլ հավատ չի ներշնչում: Իսկ Տարոնը խոսում է հանգիստ ու վստահ, նրա ձայնը հայրական երանգ ունի»:
Արձագանքելով այս ձեւակերպումներին` ԵԼՔ դաշինքի ներկայացուցիչը հարցադրում արեց, թե դրանք սոցիոլոգիայում նոր տերմիններ են: «Նոր բացահայտումներ են արվել: Դրանք պիտակավորումներ են, եւ որպես սուբյեկտիվ գնահատական կարելի է դիտարկել»,- ասաց նա` խորհուրդ տալով սոցիոլոգին զերծ մնալ անլուրջ պիտակավորումներից:
Փայլակ Ֆահրադյան
