Կառավարության այսօրվա նիստում, որը վարում է ՀՀ առաջին փոխվարչապետի պաշտոնակատար Արարատ Միրզոյանը, որոշում կայացվեց միջոցներ հատկացնել արտահերթ ընտրությունների նախապատրաստման համար:
Հիշեցնենք, որ Հայաստանի վարչապետի պաշտոնակատար Նիկոլ Փաշինյանը այսօր աշխատանքային այցով մեկնել է Աստանա՝ մասնակցելու Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի նիստին:
Զեկուցող ՀՀ արդարադատության նախարարի պաշտոնակատար Արտակ Զեյնալյանը նշեց. «2018 թվականի դեկտեմբերի 9-ին կայանալիք Հայաստանի Հանրապետության Ազգային ժողովի արտահերթ ընտրությունների նախապատրաստման և անցկացման նպատակով առաջարկվում է ՀՀ կենտրոնական ընտրական հանձնաժողովին, արդարադատության նախարարությանը և ոստիկանությանը տրամադրել համապատասխան քանակի միջոցներ և կատարել փոփոխություններ կառավարության 2017 թ. դեկտեմբերի 28-ի № 1717-ն որոշման մեջ»:
Զեյնալյանը նշեց, որ այդ նպատակով առաջարկվում է կառավարության պահուստային ֆոնդից կենտրոնական ընտրական հանձնաժողովին հատկացնել 2 մլդ 707 մլն 144 հազար 200 դրամ, արդարադատության նախարարությանը՝ 10 մլն դրամ Ընտրական օրենսգրքի 10 հազար օրինակ տպագրելու համար, իսկ ոստիկանությանը՝ 234 մլն 224 հազար 800 դրամ:
Կառավարությունը որոշումն ընդունեց միաձայն:
