Կառավարության կառուցվածքային փոփոխությունների մասին ՀԴԿ նախագահ Արամ Սարգսյանը դրական կարծիք ունի: Գնահատականը չի փոփոխվի, եթե դրանք ճիշտ հունով ընթանան:
« Ավանդույթ է դարձել՝ տարին մեկ նախարարությունների անուններ են փոխում, և դա կոչվում է կառուցվածքային փոփոխությունններ: Պետք է լինի համակարգ, որ կարողանա իրական փոփոխություններ մտցնել: Չինովնիկների քանակը շատ մեծ է: Ես կարծում եմ, դա շատ ավելի վաղ պետք է սկսվեր»,-այսօր լրագրողների հետ հանդիպմանը նշեց Արամ Սարգսյանը:
Ռուսական ռուբլու փոխարժեքի նվազումը Արամ Սարգսյանը կապում է աշխարհաքաղաքական զարգացումների հետ, բայց հույս ունի, որ ապագայում ամեն ինչ տեղը կընկնի, իսկ ահա գազի գնի սպառման ծավալների էական կրճատումն ու թանկ գնով իրացնելու շուրջ ՀԴԿ նախագահի մեկնաբանությունը մեկն է.
«Անցյալ դեկտեմբերին Ռուսաստանը հայտարարեց, որ 30 տոկոսով իջեցնում են գները, հակառակ դրա՝ մեզ մոտ գազի գինը բարձրացավ, մեր Կառավարությունն էլ անունը դրեց, որ այստեղ Գազպրոմն է գործոմ, բայց չէ՞ որ իրենք կարող են դա վերահսկել»:
Ասուլիսին ներկա ԱԺ պատգամավոր Մանվել Բադեյանը պնդեց ՝ «այո գազի գնի ձևավորումը դա Գազպրոմի գործառույթն է», իսկ Արամ Սարգսյանն էլ հակադարձեց. «Խնդիրն այն է, ոնց ենք մենք վերահսկում այդ շուկան: Մենք պիտի անենք մեր համար: Եթե մենք ենք սենց վարվում մեր ժողովրդի հետ՝ նրանց շատ պետքն ա»:
Անդրադառնալով ներքաղաքական զարգացումներին՝ Մանվել Բադեյանը նշեց, որ մեր երկրում օպոզիցիայի առկայությունը դրական է գնահատում, բայց հանրահավաքային պայքարին դեմ է: «Երթերն էլ նորմալ եմ համարում, բայց ուժային եղանակով պայքարը ապագա չունի»,- ընդգծեց պատգամավորը:
