Araratnews.am-ն այսօր տեղեկացրել էր, որ հայ հայտնի ռեփեր Հայկ Մարգարյանը՝ ՀՏ Հայկոն, հետաքրքրված է Ազգային ժողովի ճաշարանի կառավարմամբ: Երեկ նա գնացել էր խորհրդարանի ճաշարան՝ պարզելու, թե որքանով է եկամտաբեր ճաշարանի շահագործումը: Araratnews.am-ի տեղեկություններով՝ օրենսդիր մարմնի ճաշարանը սպասարկող ընկերության փոփոխությամբ շահագրգռված է նաև այս տարվա մայիսից ԱԺ աշխատակազմի ղեկավար-գլխավոր քարտուղար նշանակված Արա Սաղաթելյանը: Նշանակումից ի վեր նա փորձում է կադրային փոփոխություններ ու վերադասավորումներ իրականացնել իրեն ենթակա կառույցներում:
Խորհրդարանի միջանցքներում շրջանառվող լուրերի համաձայն՝ ՀՏ Հայկոյի` օրենսդիր մարմնի ճաշարանով հետաքրքրվելը պատահական չէ: Ասում են, թե ամռանը ԱԺ աշխատակազմի ղեկավար-գլխավոր քարտուղարի օգնական Արթուր Թովմասյանը՝ Հայաստանի կոմունիստական կուսակցության նախկին ղեկավար Ռուբեն Թովմասյանի որդին, ԱՄՆ-ում պատահմամբ հանդիպել է իր մտերիմ ծանոթ ՀՏ Հայկոյի հետ: Ու քանի որ Արա Սաղաթելյանը, ըստ լուրերի, դժգոհ է ճաշարանի կառավարումից, նրա օգնականը ՀՏ Հայկոյին առաջարկել է զբաղվել ճաշարանի կառավարմամբ:
Տեղեկացնենք, որ ՀՏ Հայկոն սննդի ոլորտում աշխատանքային փորձ ունի: Նա 90′s Cafe-Pub-ի համասեփականատերերից է:
Araratnews.am-ի հետ զրույցում Արթուր Թովմասյանը հերքեց ՀՏ Հայկոյի հետ հանդիպման, ճաշարանով հետաքրքրված լինելու լուրերը: «Այդ ամենը զրպարտություն է: Մնացած հարցերով դիմեք ՀՀ Ազգային ժողովի հանրային կապերի վարչության պետ Արսեն Բաբայանին»,- հորդորեց ԱԺ աշխատակազմի ղեկավար-գլխավոր քարտուղարի օգնականը:
ԱԺ հանրային կապերի վարչության պետ Արսեն Բաբայանին հարցրինք՝ հավաստի՞ են այն լուրերը, որոնց համաձայն՝ Արա Սաղաթելյանը դժգոհ է ճաշարանը սպասարկող ընկերությունից եւ որոշել է մրցույթ հայտարարել ճաշարանի սպասարկման համար: «Արա Սաղաթելյանի նշանակվելուց հետո կարեւորվել է աշխատակիցների կարծիքը: 3 ամիս առաջ մեր աշխատակիցների շրջանում անցկացրած հարցումներից պարզել էինք՝ ճաշարանի բարելավման կարիք կա: Աշխատակիցները դժգոհ են սննդի որակից, գներից, օդափոխությունից: Արա Սաղաթելյանը շահագրգռված է, որ խորհրդարանում բոլոր գործառույթները փայլուն լինեն»,- մանրամասնեց Արսեն Բաբայանը:
ԱԺ հանրային կապերի վարչության պետի խոսքով՝ հիմա մշակվում են այն պահանջները, որոնք պետք է առաջադրվեն ճաշարանի սպասարկման մրցույթին: «Հանձնաժողովի ձեւավորումից ու չափանիշների մշակումից հետո մրցույթ կլինի, հաղթող ընկերությունը կղեկավարի օրենսդիր մարմնի ճաշարանը»,- ասաց խորհրդարանի ներկայացուցիչը:
Ինչ վերաբերում է Արթուր Թովմասյանի հետաքրքրվածությանը, Արսեն Բաբայանն ասաց, որ դա էական նշանակություն չունի: Արթուր Թովմասյանն ինչքան էլ հետաքրքրված լինի խորհրդարանի ճաշարանով, հայտարարվելու է մրցույթ: Բացի ՀՏ Հայկոյից, 5 ընկերություն եւս հետաքրքրված է ճաշարանի կառավարմամբ:
Եթե ԱԺ աշխատակազմի ղեկավար Արա Սաղաթելյանը դժգոհ է ճաշարանի վիճակից, ինչո՞ւ չեն առաջարկում ճաշարանը սպասարկող ընկերությանը շտկել թերությունները: ԱԺ հանրային կապերի վարչության պետն ասաց, որ 3 ամիս առաջ ներկայացրել են իրավիճակը ճաշարանի ղեկավարմամբ զբաղվող ընկերությանը: Նա, Բաբայանի խոսքով, միգուցե փորձել է կատարել որոշակի փոփոխություններ, բայց դրանք դեռ չեն բավարարում ԱԺ աշխատակիցների պահանջները:
Զրուցեցինք նաև ճաշարանի կառավարմամբ զբաղվող «Ազգային սնունդ» ընկերության ղեկավար, հրուշակագործ Էդուարդ Գրիգորյանի հետ: Նրա խոսքով՝ մրցույթի անցկացման մասին իրեն ԱԺ աշխատակազմը տեղեկացրել է մի քանի օր առաջ՝ նախորդ շաբաթ:
«Ազգային սնունդ» ընկերության ղեկավարը սննդի բնագավառում աշխատելու երկար տարիների փորձ ունի: Հիշում է՝ ժամանակին պատգամավորների մեծ մասն էր օգտվում խորհրդարանի ճաշարանից, բայց աստիճանաբար նրանց թիվը նվազեց:
Էդուարդ Գրիգորյանի խոսքով՝ մի քանի անգամ խորհրդարանի ճաշարանը հանձնել են տարբեր կառավարիչների, սակայն նրանք չեն կարողացել ղեկավարել այն: Դրանից հետո՝ 2014-ին, հետ են կանչել Էդուարդ Գրիգորյանին: Նա 2009-2014-ին ԱԳ նախարարության խնդրանքով աշխատել է նախարարության ճաշարանում, որը, իր խոսքով, մի խոհանոցի չափ տարածք է: Աշխատանքն այնքան է գոհացել ԱԳ նախարար Էդվարդ Նալբանդյանին, որ անգամ Էդուարդ Գրիգորյանին շնորհակալագրով է պարգեւատրել:
Հնարավո՞ր է, որ ԱԺ աշխատակիցներ են բողոքել ղեկավարությանը ճաշարանի սննդի որակից, որից հետո էլ Արա Սաղաթելյանը որոշել է մրցույթ հայտարարել: Էդուարդ Գրիգորյանն ասաց, որ ԱԺ-ի որոշ խմբակցություններ աշխատակազմին սննդի որակից դժգոհել են: «Հարցնում եմ խմբակցություններին, թե կոնկրետ ինչի՞ց եք դժգոհ, ասում են՝ բողոք չունենք»,- պատասխանեց ճաշարանի պատասխանատուն:
Թեեւ հանձնաժողովն ու մրցույթի պայմանները դեռ հստակ չեն, բայց «Ազգային սնունդ» ընկերությունը նույնպես մասնակցելու է մրցույթին: Եթե չհաղթի` հոգ չէ: «Մի որոշ ժամանակ կհանգստանամ, հետո էլի մի տեղից կկանչեն ինձ»,- վստահ է մեր զրուցակիցը:
ՍՈՆԱ ԴԱՎԹՅԱՆ
