Երևանի Սիրահարների այգում շտապօգնության բժիշկն իր վարքով հիմնականում համապատասխանել է բժշկի կեցվածքին՝ չհաշված իր վերջին արտահայտությանը, Araratnews.am-ի հետ զրույցում ասաց ՀՀ առողջապահության նախարար Արմեն Մուրադյանը՝ անդրադառնալով օրերս տեղի ունեցած միջադեպին: Հիշեցնենք. Սիրահարների այգում Երևանի «Շտապօգնության» բժիշկ Վահրամ Անդրեասյանը օգնության է եկել ինքնազգացողությունը վատացած տարեց մարդուն ու անհարգալից է խոսել նրա հետ: Վերջինիս հետ շփվելիս նա կորցրել էր համբերությունը ու կոպտել. «Արի գոնե նստի: Հազար մարդ կա ստեղ, հո դու խայտառակ չե՞ս: Չես գալի՞ հմի հիվանդանոց: Հավեսդ չունեմ»,- ասել էր բժիշկը գետնին պառկած մարդուն:
Արմեն Մուրադյանն ասաց, թե բժիշկը ենթարկվել է կարգապահական տույժի և ոչ ավելի. «Չեմ կարծում, որ որևիցե ավելի միջոց պետք էր կիրառել բժշկի նկատմամբ, որը եկել էր օգնության ու պատրաստ էր օգնել, ծառայել: Ուղղակի էմոցիոնալ արտահայտություն է արել, որի հետ կապված ենթարկվել է վարչական տույժի», — ասաց նախարարը:
