ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նոյեմբերի 22-ին ընդունեց Հայաստանում Համաշխարհային բանկի գրասենյակի ղեկավար Լորա Բեյլիին:
Ողջունելով հյուրին` նախարարը բարձր գնահատեց Համաշխարհային բանկի հետ համագործակցությունը, մասնավորապես, ՀԲ-ի աջակցությամբ իրականացվող «Կենսական նշանակության ճանապարհային ցանցի բարելավման» ծրագիրը:
Լորա Բեյլին հայտնեց, որ նախարարության հետ համատեղ իրականացվող ծրագրերն այժմ ավարտական փուլում են:
«Մեր համագործակցությունը մինչ այժմ արգասաբեր է եղել, և մենք ուրախ ենք շարունակել աշխատանքը հուսալի գործընկերոջ հետ»,- ասաց ՀԲ գրասենյակի ղեկավարը:
Նախարարը հույս հայտնեց, որ Համաշխարհային բանկի հետ ճանապարհաշինական ծրագրերի հաջող փորձը կշարունակվի նաև տեղեկատվական տեխնոլոգիաների, կապի և տրանսպորտի ոլորտներում:
