Լրագրողների հետ զրույցում ՀՀ նախկին վարչապետ Հովիկ Աբրահամյանի որդին`«Ծառուկյան» դաշինքի պատգամավոր Արգամ Աբրահամյանը, անդրադարձել է լրատվամիջոցների այն տեղեկություններին, ըստ որոնց՝ Աբրահամյանները վաճառել են «Արտֆուդ» ընկերությունում իրենց 50 տոկոս բաժնեմասը, գազալցակայանները: Սամվել Ալեքսանյանն էլ գնել է Արտաշատի տրիկոտաժի ֆաբրիկան:
Հովիկ Աբրահամյանն օրերս տված իր հարցազրույցում բիզնեսների վաճառքի փաստը մեկնաբանել էր որպես օպտիմալացում:
Արգամ Աբրահամյանը հերքեց այդ տեղեկությունները: «Ո՞վ է ասում, որ վաճառվում է: Ոչ մի բան էլ չի կատարվում»,- ասաց օրենսդիր մարմնի անդամը:
Ըստ Աբրահամյանի` տրիկոտաժի գործարանի հետ իրենք վաղուց կապ չունեն: Ընդամենը վաճառել են մի գազալցակայան, որի սեփականատերն իր հորեղբայրն է: Արգամ Աբրահամյանը նորմալ է համարում, երբ բիզնեսմենը որեւէ օբյեկտից շահույթ չստանալուց հետո այն վաճառում է, հիմնում է մեկ այլ բիզնես:
Անդրադառնալով Աբրահամյանների հանքի վաճառքին` Աբրահամյանն ասաց, որ դա ևս իր հորեղբորն է պատկանել, բայց այն չի աշխատել:
Ինչ վերաբերում է «Արտֆուդի» 50% բաժնեմասի վաճառքին, «Ծառուկյան» դաշինքի պատգամավորը հերքեց այդ տեղեկությունը:
ՍՈՆԱ ԴԱՎԹՅԱՆ
