Մեր նախորդ հրապարակման մեջ արդեն ներկայացրել էինք սննդային թունավորման դեպքի մասին, որը պատճառը եղել էր թռչնամիսը։
Հիշեցնենք, որ ոլորտում վերահսկողության և հասարակական ահազանգի հետքերով ուսումնասիրություններ կատարելու մասին փորձել էինք պարզաբանումներ ստանալ ՀՀ գյուղատնտեսության սննդամթերքի անվտանգության պետական ծառայության պետի մամուլի քարտուղարից, ով Araratnews.am-ին հայտնել էր, որ թռչնամսի շուկայում, որի մեջ ներառվում են խանութները և արտադրամասերը՝ հոկտեմբերի 20-ից սկսել են կատարել անասնահամաճարակային մշտադիտարկում և դիտարկում, ինչպես նաև խմբեր պետք է ձևավորվեին՝ դրանք լայնածավալ ձեւով իրականացնելու նպատակով:
Այսօր արդեն կան անասնահամաճարակային մշտադիտարկումների ու դիտարկումների արդյունքները: Ինչպես տեղեկացանք ՀՀ գյուղատնտեսության սննդամթերքի անվտանգության պետական ծառայության պետի մամուլի քարտուղար Նվարդ Առաքելյանից՝ խոշոր սուպերմարկետների ցանցերի (Երևան սիթի, ՍԱՍ, Պարմա, Կրպակ, Նոր զովք) տարբեր հասցեներում գտնվող խանութներում արվել են դիտարկումներ և անասնահամաճարակային մշտադիտարկումներ.«Այս խանութներում թե´ ներմուծված, թե´ տեղական հավի 21 նմուշառում է արվել և ուղարկվել լաբորատոր փորձաքննության: 6 նմուշներում անհամապատասխանություններ են հայտնաբերվել. 5-ում՝ մանրէաբանական ցուցանիշներով, որոնք հիմնականում առաջանում են սանիտարական պայմանները չպահպանելու դեպքում, 1-ում էլ սալմոնելա է եղել, որը տեղական արտադրության պաղեցված հավի մեջ է հայտնաբերվել՝ «Տեղական» ՍՊԸ:
Որպեսզի ծառայությունը պարզի, թե տեղական արտադրության որ փուլում է խախտումը, շարունակվում են այդ ուղղությամբ քայլերը: Խախտումներով բոլոր այսինչ ամսաթվին արտադրված խմբաքանակների վաճառքը կասեցվել է իրացման վայրերից, ինչպես նաև պահեստից հետ են կանչվել: Դրանք արդեն ենթակա են ոչնչացման կամ օգտահանման»:
«ՄԱՖԱՄ ցուցանիշով անհամապատասխանություններ են հայտնաբերվել «Նուբարաշենի թռչնաբուծական ֆաբրիկայի» հավի մեջ, «Սարատովի թռչնաբուծական ֆաբրիկայի» ներմուծված սառեցված բդիկներում, «Կուռնիկով» ՍՊԸ-ի սառեցված հավի մեջ, «Անդրե Րենթեր»-ի «Շուշի» սառեցված հավի մեջ, «Ագրոթեք-ինվեստ» ՍՊԸ-ի «Լուսակերտ» հավի թևի մեջ»:
