Լեռնային Ղարաբաղի դպրոցներում, նույնիսկ ամենափոքր գյուղերում, փակցված է Ռուսաստանի Դաշնության զինանշանը, իսկ գրականության կաբինետներում՝ Լերմոնտովի գլխավորությամբ ռուս գրողների դիմանկարները: Այս մասին Свободная пресса-ում հրապարակված իր հոդվածում գրել է ռուս գրող և լրագրող, քաղաքագետ Էդուարդ Լիմոնովը, ով օրեր առաջ այցելել էր Արցախ:
«Ղարաբաղը (խորհուրդ եմ տալիս մտածել այս թեմայի շուրջ) մոլորակի այս հատվածում ամենահեռավոր քրիստոնեական հողն է: Ղարաբաղը սահմանակից է Իրանին, Թուրքիային և Ադրբեջանին: Արմատական իսլամի մթնոլորտում մենք պետք է հոգ տանենք այդ հողերի մասին»,- գրել է Լիմոնովը:
Ռուս գրողը նշել է, որ ղարաբաղցի հայերն ավելի մոտ են ռուսներին, քան սլավոնական շատ ժողովուրդներ, և Ռուսաստանը պետք է աջակցի նրանց, ովքեր ունեն դրա կարիքը:
Նրա խոսքով՝ երբ Ռուսաստանը ճանաչի Արցախը, այն երկար կապրի և կբարգավաճի:
