Տաքսու վարորդներն այսօր նորից հավաքվել էին կառավարության շենքի մոտ՝ իրենց 100 ստորագրությամբ դիմումը հանձնելու համար:
«Դիմումը ուղղում ենք ՀՀ նախագահին և վարչապետին: Շնորհակալություն ենք հայտնում կառավարությանը՝ տրանսպորտի ոլորտում մեր կողմից ներկայացված 24 կետերով առաջարկները լսելու և դրանց նկատմամբ գործընթաց սկսելու կապակցությամբ: Բոլոր գերատեսչական մարմինները՝ Երևանի քաղաքապետարանը, ոստիկանությունը, սկսել են իրենց ստուգայցերը և ուսումնասիրությունները՝ ոլորտը կարգավորելու ուղղությամբ, բացի տրանսպորտի և կապի նախարարությունից: Ընդհակառակը՝ գաղտնի ֆոտոնկարահանումներով նրանք սկսել են մարդկանց տուգանել 50.000 դրամով և անգամ այն քաղաքացիներին, ովքեր երբևէ տաքսու վարորդներ չեն եղել»,-նշեց «Ավտովարորդների պաշտպանության լիգայի» նախագահ Տիգրան Հովհաննիսյանը:
Լիգայի նախագահի խոսքով՝ իրենք իրենց պայքարը շարունակելու են այնքան ժամանակ, մինչև նախարար Բեգլարյանը նոր փոփոխություններ կատարի.«Կապի և տրանսպորտի նախարարությունը փակուղի է մտել, վերջին տարիների ընթացքում իրենց կողմից մշակված անտրամաբանական լիցենզավորման կարգի պատճառով և ամոթի զգացումը հազարավոր խաբված տաքսու վարորդների նկատմամբ կուրացրել է նրա վերնախավին ու դրդում է կատարել անմարդկային գործեր, փոխարենը սկսելու բանակցություններ այն հասարակական կազմակերպությունների հետ, որոնք ճիշտ հեռանկարը վաղուց են մշակել տրանսպորտի ոլորտը փրկելու համար: Մենք շարունակելու ենք մեր պայքարն ամեն հինգշաբթի՝ կառվարության շենքի դիմաց, մինչև պարոն Բեգլարյանը հասկանա, որ շուտափույթ փոփոխությունները ուշացնելով ինքը կմնա բոլոր տաքսու վարորդների հիշողության մեջ որպես 50 հազար դրամ տուգանող նախարար»:
Տաքսու վարարդները նաև նշում են, որ պատահում է, երբ յոթ օրվա մեջ հինգ տուգանք է գալիս մեկ մեքենայի համար:
