Հաջորդ շաբաթ՝ մայիսի 13-ին սկսվում է Աբովյանի քաղաքապետի ընտրություններում թեկնածուների առաջադրման փուլը:
Քաղաքապետ դառնալու իրենց հավակնությունների մասին հայտարարել են Գագիկ Ծառուկյանի սանիկ, «Կինգ Դելյուքս» ընկերության սեփականատեր Արթուր Հարությունյանը (Պալաչ), ԱԺ պատգամավոր Մելիք Մանուկյանի եղբայր Վարդան Մանուկյանը եւ ԲՀԿ-ականների հետ սերտ հարաբերություններ ունեցող Վահագն Գեւորգյանը:
Քիչ առաջ մեզ հետ զրույցում Վարդան Մանուկյանը հայտարարեց. «Մտադրություն չունեմ փաստաթղթերս ներկայացնելու, հավանաբար չեմ առաջադրվի»:
Երբ խնդրեցինք պարզաբանել պատճառը՝ Մանուկյանն ասաց, որ զբաղված է:
Ավելի վաղ հայտարարել էիք, որ առաջադրվելու եք, ինչո՞ւ փոշմանեցիք՝ հետաքրքրվեցինք Մանուկյանից:
Նա նկատեց, որ փոշմանելու բան չկա եւ կրկին ընդգծեց, որ զբաղված է:
Աբովյանում շրջանառվող տեղեկությունների համաձայն՝ Մանուկյանը «դաբրո» չի ստացել եւ դա է նրա չառաջադրվելու պատճառը:
Ստացվում է, որ Աբովյանում հունիսի 7-ին կայանալիք քաղաքապետի ընտրություններում պայքարելու են Արթուր Հարությունյանը (Պալաչ), որը Ծառուկյանի սանիկն է եւ նրա հետ լուրջ հակասություններ ուներ, եւ Վարդան Գեւորգյանը, ով վայելում է Ծառուկյանի աջակցությունը:
Արթուր Հարությունյանը հրաժարվեց պատասխանել մեր հարցերին՝ ասելով, որ զբաղված է:
Վահագն Գեւորգյանը մեր թղթակցի հետ զրույցում ասել էր, որ ինքն առաջադրվելու է եւ Ծառուկյանը իր հավանությունն է տվել իր թեկնածությանը:
Աբովյանում նախընտրական քարոզարշավը կմեկնարկի մայիսի 26-ին եւ կշարունակվի մինչեւ հունիսի 5-ը ներառյալ:
