Լրատվամիջոցներն այսօր տեղեկացրել են, որ Շիրակի մարզի ատամնաբույժները բողոքի ակցիա են արել: Նրանք դժգոհում են էլեկտրոնային առողջապահության համակարգից: Ատամնաբույժները վստահեցնում են՝ այս համակարգի պատճառով կթանկանան ատամնաբուժական ծառայությունները, քանի որ յուրաքանչյուր ատամնաբույժ հավելյալ 1 մլն դրամ ծախս պետք է անի: Ատամնաբույժներին լսել են նաև Շիրակի մարզպետարանում: Araratnews.am-ը զրուցեց Շիրակի մարզպետ Արթուր Խաչատրյանի հետ՝ հանդիպման արդյունքների մասին:
Պարո՛ն Խաչատրյան, Շիրակի մարզի ատամնաբույժների հետ ի՞նչ քննարկեցիք: Ընդունելի՞ է Ձեզ համար նրանց մտահոգությունը:
Խնդիրը մարզպետարանի լիազորությունների հետ կապ չունի: Հասցեատերը մենք չենք: Բողոքի մասին կտեղեկացնենք առողջապահության նախարարությանը:
Իսկ ատամնաբույժների մտահոգությունն ընդունելի՞ է Ձեզ համար:
Մտահոգությունների մի մասին համաձայն եմ, մի մասին՝ ոչ այնքան: Իմ անձնական կարծիքը չեմ ուզում ասել:
Ըստ Ձեզ՝ ատամնաբույժների բողոքի ակցիան արդյունք կտա՞, եթե կառավարությունը էլեկտրոնային առողջապահության համակարգի ներդրման ջատագովն է:
Կապրենք, կտեսնենք: Մենք բողոքողների նամակը կփոխանցենք առողջապահության նախարարություն:
Որպես քաղաքացի՝ մտավախություն չունե՞ք, որ ատամնաբուժական ծառայությունների գները կբարձրանան:
Դա թուղթ ու գրչով պետք է հաշվարկել՝ քանի ատամնաբույժ կա, ինչքան հաճախորդ է ընդունում, ինչքան գումար է վերցնում:
Առողջապահության նախարարությունը էլեկտրոնային առողջապահության համակարգի ներդրումից առաջ մարզպետարանի առողջապահության և սոցիալական ապահովության վարչության մասնագետների հետ քննարկում արե՞լ է:
Խորհրդակցություններ եղել են: Ակնհայտ է, որ էլեկտրոնային առողջապահության համակարգի պլյուսները շատ են, քան մինուսները: Համակարգի շնորհիվ կհասկանանք առողջապահության համակարգի ծավալները:
Իսկ մինուսնե՞րը:
Որոշակի մտահոգությունների մասին խոսել ենք: Դրանք աշխատանքային խորհրդակցություններ են, որոնք հրապարակման ենթակա չեն:
Սոնա Դավթյան
