Ռուսաստանը պատրաստ է, որպես միջնորդ, ջանքեր ներդնել տարածաշրջանային հակամարտությունների կարգավորման համար: «ՌԻԱ Նովոստի»-ի փոխանցմամբ՝ այս մասին հայտարարել է Ռուսաստանի նախագահ Վլադիմիր Պուտինը Հայաստանի հետ հարաբերությունների մասին խոսելիս
«Հայաստանի հետ մեզ կապում են բարեկամության եւ փոխըմբռնման կապերը: Երեկ տեղի ունեցած նախագահ Սերժ Ազատովիչ Սարգսյանի հետ հանդիպումը ցույց տվեց, որ Ռուսաստանը եւ Հայաստանը, որպես դաշնակիցներ, միմյանց հուսալիորեն աջակցում են եւ միասին են առաջ մղում եվրասիական ինտեգրացիայի գործընթացը: Մեր երկրների միջեւ հաջողությամբ զարգանում է համագործակցությունը տնտեսության, առեւտրի, ներդրումների, ռազմատեխնիկական ոլորտներում: Ընդլայնվում են շփումները տուրիզմի, մշակույթի, գիտության եւ կրթության ճյուղերում: Սերտ համագործակցություն է հաստատվում երկու երկրների շրջանների միջեւ: Ռուսաստանը պատրաստ է, որպես միջնորդ, առավելագույն ջանքեր ներդնել տարածաշրջանային հակամարտությունների կարգավորման համար»,- ասել է Պուտինը արտասահմանյան պետությունների դեսպաններին հավատարմագրեր հանձնելու արարողության ժամանակ:
