Արդեն 4-րդ օրն է` ուսանողները շարունակում են դասադուլն ընդդեմ տարկետման իրավունքի վերացման: «Ելք» դաշինքի պատգամավոր Արարատ Միրզոյանը երեկ մեզ հետ զրույցում ասել էր՝ իրեն լուրեր են հասնում, թե փորձում են հետապնդել ուսանող ակտիվիստների: Խոսակցություններ կան, որ ԵՊՀ-ի ղեկավարությունը հաշվեհարդար է տեսնելու ուսանողների հետ: Araratnews.am-ը կապ հաստատեց ԵՊՀ ռեկտոր Արամ Սիմոնյանի հետ՝ լուրերի իսկությունը պարզելու: Ռեկտորը հերքեց ուսանողների հետ հաշվեհարդար տեսնելու մասին լուրերը:
Հետաքրքրվեցինք՝ իսկ թե դասադուլ անող ուսանողների բացակաները դրվո՞ւմ են: «Ինչպես բոլոր ուսանողներինը, այնպես էլ դասադուլ անողներինը, երեւի, դրվում են: Դա ընդունված ձեւ է, բոլոր մատյաններում դրվում է: Ներկա-բացակա անում են՝ կարգուկանոնը պահելու համար»,- ասաց ռեկտորը:
Հնարավո՞ր է դասադուլավորների բացականերն այնքան շատ լինեն, որ նրանք դուրս մնան համալսարանից: Արամ Սիմոնյանի պարզաբանմամբ՝ 120 ժամ բացակայության դեպքում ուսանողը նկատողություն է ստանում. «Ինչո՞ւ պիտի բացառություն անեմ դասադուլ անող ուսանողների համար, որոնք բացակայում են դասերից դասադուլների պատճառով»:
Արամ Սիմոնյանը չի կարծում, որ դասադուլների պատճառով ուսանողները դուրս կմնան համալսարանից: «Սովորաբար բացակաների համար ուսանողներին համալսարանից չենք հեռացնում»,- հավաստիացրեց ԵՊՀ ռեկտորը:
Սոնա Դավթյան
