Առողջապահության նախարար Լեւոն Ալթունյանը նախաձեռնել է մի շարք բարեփոխումներ, որոնցից մեկը վերաբերում է առաջնային օղակի հիմնարկներում՝ պոլիկլինիկաներում, փոփոխություններ կատարելուն: Առողջապահության նախարար Լեւոն Ալթունյանից Araratnews.am-ը հետաքրքրվեց, թե ինչ բարեփոխումների մասին է խոսքը:
Գործադիր մարմնի անդամի խոսքով՝ նախ եւ առաջ բժշկի որակը պետք է փոխվի. «Այդ գործընթացը տեւում է 2-7 տարի: Ամեն ինչ սկսվում է ուսումնական ծրագրերից եւ օրենսդրական ակտերից: Պոլիկլինիկաների բարեփոխման նախագիծը նախարարությունում է: Երեւանի պետական բժշկական համալսարանի ռեկտոր Արմեն Մուրադյանի հետ եւս քննարկել ենք այս հարցը»:
Նախարարին հարցրինք՝ պոլիկլինիկաներին հատկացվող միջոցներով հնարավո՞ր է հասնել առաջնային օղակի հիմնարկների որակական փոփոխության: Ֆինանսական միջոցները, Լեւոն Ալթունյանի խոսքով, որակի հետ կապ չունեն. «Որակի փոփոխությունը պայմանավորված է ուսումնական ծրագրերով, միջազգային չափանիշներին ինտեգրվելով, որոնցից մեկը Հայաստան-ԵՄ շրջանակային համաձայնագիրն է»:
Առաջնային օղակի հիմնարկների բուժաշխատողները հաճախ հիվանդներին ոչ պատշաճ վերաբերմունքն ու մատուցված ծառայությունները բացատրում են իրենց ցածր աշխատավարձով: Աշխատավարձն ու ցածր որակը, ըստ նախարարի, կապ չունեն միմյանց հետ: «Դա նույնն է, որ ասենք՝ լողալը սովորեք, ջուրը կլցնենք: Մարդն աշխատում է այնպես, ինչպես կարող է: Սովորում է այն որակով, որն ընդունված է այդ համակարգում: Գաղտնիք չէ, որ մեր երիտասարդների մեջ մոդայիկ չէ սովորելը: Փողոցում ավելի շատ են լինում, քան լսարաններում: Սա մոդա է, որը պետք է ջարդել»,- ասաց կառավարության անդամը:
Առողջապահության նախարարի տեղեկացմամբ` պոլիկլինիկաների բարեփոխման առաջին քայլը բուժհաստատությունների օպտիմալացումն է, անհրաժեշտ բուժծառայությունների հաշվարկը. «Ամեն բնակավայրում մեկ պոլիկլինիկա, ամեն շենքին՝ մեկ բժիշկ՝ առաջ այսպես էին զարգանում, որի պատճառով գումարը փոշիանում էր: Հիմա պոլիկլինիկաներին տրվող պետբյուջեի միջոցները կենտրոնացնում ենք եւ կարևորում անապահով խավերին ծառայություններ մատուցելը բյուջեի հաշվին»:
Սոնա Դավթյան
