Այսօր «Երկիր ծիրանի» կուսակցության նախագահ Զարուհի Փոստանջյանն քարոզարշավի շրջանակներում եղավ Ավան վարչական շրջանում: Եվ չնայած կարծիքներին, որ Ավանը Երևանի քիչ թե շատ բարեկարգ շրջաններից է, Փոստանջյանը չհամաձայնեց, նշելով, որ գուցե մի քանի պուրակներ կան` դեկորատիվ ծաղիկներով, որոնք կարող է էսթետիկորեն հաճելի են, բայց իրականում ամբողջ քաղաքը նույն վիճակում է՝ բակերը քանդված են, իսկ շենքերը նորոգման կարիք ունեն. «Հասկանալի է, որ շուրջ 25 տարի քաղաքում ոչինչ չի արվել, և հենց մասնավորապես Տարոն Մարգարյանն իր պաշտոնավարման ընթացքում մեր հանրային գումարներն ուղղակի յուրացրել է»:
Փոստանջյանը շրջայցի ժամանակ նաև եղավ Բաբաջանյան 77/7 հասցեում՝ գործող քաղաքապետ Տարոն Մարգարյանի տան մոտ. «Եկել ենք այստեղ, որպեսզի ցույց տանք, թե որտեղ են մեր հանրային գումարները հանգրվանել: Մեր հանրային գումարները վերածվել են այսպիսի տների կամ դղյակների: Ափսոս է, որ քաղաքապետը ոչ թե քաղաքի, այլ իր անձնական բարեկեցության մասին է մտածում, մինչդեռ մի քանի մետր այն կողմ ճանապարհներն ու բակերը քանդված են: Հետևաբար դու չես կարող քո աշխատավարձով ձեռք բերել նման տուն… ուղղակի պետք էր դա ընդգծել, դրա համար ենք եկել այստեղ»:
