Երևանի Մաշտոցի պողոտայի սկզբնամասում գտնվող Փակ շուկայի ետնամասում կուտակված աղբն ամբողջությամբ մաքրվել է: Երևանի ավագանու ընտրություններին մասնակցող «Ելք» դաշինքի քաղաքապետի թեկնածու Նիկոլ Փաշինյանը ֆեյսբուքյան իր էջում լուսանկար է հրապարակել ու մակագրել. «Փակ շուկայի ետնամասը երեկվա ուղիղ եթերից հետո մաքրել են։ Էլի սիրուն չի, բայց գոնե աղբակույտեր չկան»։
Հիշեցնենք, որ Փաշինյանը երեկ ուղիղ միացմամբ ֆեյսբուքում ներկայացրել էր աղբանոցի վերածված տարածքը:
«Այսօր բազմաթիվ անհատ ձեռներեցներ, փոքր ձեռնարկատերեր Երևանի քաղաքապետարանի կողմից հսկայական տուգանքների են ենթարկվում՝ իրենց պատկանող տարածքների մերձակա հատվածները չբարեկարգելու, սանիտարական վիճակը չպահելու համար: Բայց, ինչպես տեսնում եք, Սամվել Ալեքսանյանին պատկանող օբյեկտները նման վերաբերմունքի չեն արժանանում Տարոն Մարգարյանի կողմից: Ի դեպ, երեկ մենք Էրեբունի վարչական շրջանում էինք քարոզարշավ իրականացնում, և զարմանալի է, թե էրեբունու «Երևան սիթիի» դիմաց աղբի ինչպիսի կուտակումներ կային: Մոտավորապես նույն վիճակն էլ այնտեղ էր»,- գրել էր նա:
