«Նաիրիտ» գործարանի հրդեհի մասին երկու վարկած է շրջանառվում. առաջին՝ գուցե գործարանը վերագործարկելու ցանկություն ունեցող ներդրողներից եւ տեղի ունենալիք աուդիտից առաջ ինչ-որ թաքցնելու բա՞ն կար: Երկրորդ վարկածն այն է, որ հրդեհը լավ առիթ է գործարանի աշխատակիցներին աշխատավարձ չվճարելու համար: Araratnews.am լրատվականը կապ հաստատեց Եվրոպայի հայկական միությունների ֆորումի նախագահ, գործարար, «Նաիրիտ» գործարանում մի խումբ գործարարների հետ ներդրումներ կատարելու պատրաստակամություն հայտնած Աշոտ Գրիգորյանի հետ՝ պարզելու, թե արդյոք հրդեհը կարո՞ղ է վանել ներդրողների այն խմբին, որոնք Հայաստան են եկել Աշոտ Գրիգորյանի խնդրանքով: «Գործարանում ներդրում անելու ցանկություն կա: Հիմնական ներդրողը ես եմ: Ես մինչեւ վերջ գնալու եմ՝ անկախ իմ գործընկերների ցանկությունից: Այնքան գումարներ ու ժամանակ ենք ծախսել, որ հետքայլը տնտեսական մեծ կորուստ է»,- ասաց Աշոտ Գրիգորյանը:
Գործարարը հիշեցրեց, որ շաբաթներ առաջ իր գործընկեր ներդրողները պետք է հանդիպեին վարչապետ Կարեն Կարապետյանի հետ, սակայն նրա փոխարեն ներդրողների հետ հանդիպեց փոխվարչապետ Վաչե Գաբրիելյանը. «Հանդիպումից հետո որոշեցին աուդիտ անել, սակայն մինչ օրս գործարանում աուդիտ անելու, գործարկելու պայմանագիրը չի ստորագրվել: Իմ գործընկերները պահանջում են, որ ես վարչապետից բացատրություն պահանջեմ դրա համար»:
Կարծիք կա, որ հրդեհը միտումնավոր էին կազմակերպել՝ ներդրողներից ինչ-որ բաներ թաքցնելու համար: Աշոտ Գրիգորյանը հիշեցրեց՝ տարիներ առաջ եւս հրդեհ է եղել, մարդիկ են զոհվել: Բացի հրդեհից, կողոպուտ է եղել գործարանում վարչապետ Տիգրան Սարգսյանի օրոք: Տիգրան Սարգսյանի եղբայրն էլ նրա վարչապետության ժամանակ տնօրեն էր գործարանում: Ինչո՞ւ պիտի ցանկանային, որ օտար ներդրողները գործարան մտնեին եւ այդ ամենը տեսնեին (նկատի ունի կողոպուտն ու թալանը.-խմբ. ):
Եվրոպայի հայկական միությունների ֆորումի նախագահի դիտարկմամբ` Հայաստանի փրկությունը քիմիական արդյունաբերության զարկ տալն է: «Պետք է կոտրենք կառավարության եւ նախագահ Սերժ Սարգսյանի համառությունը»,- եզրափակեց իր խոսքը Աշոտ Գրիգորյանը:
ՍՈՆԱ ԴԱՎԹՅԱՆ
