Սարգսյանի խոսքով` նման ցուցանիշները պայմանավորված են երեք գործոնով. նախ՝ ակտիվացել է վարչարարությունը ոչ սթափ վիճակում վարորդների նկատմամբ, հաջորդը տարեսկզբից ակտիվ պայքարն էր առջևի թաղանթապատված հողմապակիով տրանսպորտի վարորդների նկատմամբ, և երրորդը՝ սահմանված արագության գերազանցման փաստերի հայտնաբերման ուղղությամբ աշխատանքները: Նա նաև տեղեկացրեց, որ նախորդ տարվա համեմատությամբ նվազում է արձանագրվել նաև մանկահասակ երեխաների մասնակցությամբ կատարված ՃՏՊ-ների քանակում` 27-ով:
Անդրադառնալով նոր ուսումնական տարվա մեկնարկին` Սարգսյանն ասաց, որ հայտարարվել է անվտանգ երթևեկության միամսյակ, և սեպտեմբերի 1-ից հանրապետության բոլոր դպրոցների մոտ պարեկություն են իրականացնելու ոստիկանական կարգախմբեր: Ճանապարհային ոստիկանության ճանապարհապարեկային ծառայության բաժնի պետի խոսքով` այդ ուղղությամբ ոստիկանության կողմից արդեն իսկ աշխատանքներ են իրականացվել: «Օգոստոսի 1-ից սկսած հանդիպումներ են կազմակերպվել գրեթե բոլոր դպրոցների տնօրենների հետ, բազմաթիվ դպրոցների մոտակայքում նոր գծանշաններ է արվել, եթե անհրաժեշտություն է եղել` թարմացվել են ճանապարհային նշանները և նոր նշաններ են տեղադրվել»,-ասաց նա, ընդգծելով, որ ամեն ինչ արվելու է երեխաների տուն-դպրոց ճանապարհն անվտանգ ապահովելու համար:
Նորիկ Սարգսյանի խոսքով՝ անվտանգության ապահովումը կախված է ոչ միայն ոստիկանությունից, այլ նաև երեխաներից, ծնողներից: «Լուրջ քարոզչություն պետք է իրականացնել, որպեսզի համատեղ ուժերով միամսյակը ամփոփենք բոլորիս համար ցանկալի արդյունքով»,- նշեց նա: Եզրափակելով` նա տեղեկացրեց, որ այսօրվանից դպրոցների մոտակայքում գործող թույլատրելի արագությունը, որը ամառային ռեժիմի անցնելու պատճառով սահմանվել էր 60 կմ/ժամ, դարձել է 40 կմ/ժամ:
