Նախկին ԲՀԿ-ականը առաջարկը ստացել է Սերժ Սարգսյանից եւ հաճույքով ընդունել

Araratnews.am-ի զրուցակիցն է ԱԺ պատգամավորի թեկնածու Բազմասեր Առաքելյանը: Նշենք, որ նա ԲՀԿ անդամ էր, սակայն 2015 թվականի փետրվարյան հայտնի իրադարձություններից հետո լքեց «Բարգավաճ Հայաստան» կուսակցությունը` ակտիվորեն համագործակցելով ՀՀԿ-ի հետ: Առաքելյանը պարբերաբար Բաղրամյան 26 էր գնում: Այցերն աննպատակ չանցան:  Առաքելյանը ապրիլյան  խորհրդարանական ընտրություններում ռեյտինգային ընտրակարգով առաջադրվել է Արագածոտնի  մարզից` ՀՀԿ ցուցակով:

ՀՀԿ-ական դառնալու մտադրությո՞ւն ունեք:

Ես առաջադրվել եմ ՀՀԿ ցուցակով:

Նույն ընտրատարածքում ՀՀԿ-ն առաջադրել է այլ անձանց, ձեր շանսերն ինչպե՞ս եք գնահատում:

Բոլորին էլ լավ ճանաչում եմ, բոլորն էլ իմ հայրենի մարզի ներկայացուցիչներն են, բոլորն էլ իմ ընկերներն են: Մրցակցությունը նորմալ, արդար պայքար է լինելու, գնանք ընտրություններ, արդյունքներից կերեւա:

Դուք ինքներդ ձեր շանսերն ինչպե՞ս եք գնահատում:

Շատ բարձր:

Ինչի՞ց ելնելով:

5 տարի պատգամավոր եղած  ժամանակահատվածում ես արդեն  պատկերացրել եմ` ի՞նչ է նշանակում, այդ ժամանակ էլ արել եմ ամեն ինչ իմ ուժերի ներածին չափով, դա ժողովուրդը երբեք չի մոռանա:

Օրինակ` ի՞նչ եք արել, որ ժողովուրդը չի մոռացել:

Հարցրեք իմ տարածքի բնակիչներին:

Միեւնույն ժամանակ կա տեսակետ, որ նույն տարածքում առաջադրվող նույն կուսակցության անդամները եւս պայքարելու են իրար դեմ:

Իրար դեմ ասվածը հարաբերական է, ի՞նչ է նշանակում պայքարել իրար դեմ:

Դա այն է, որ, ասենք, դուք անելու եք հնարավոր ամեն ինչ, որ ավելի շատ ձայն ստանաք, քան մյուս ՀՀԿ-ականները:

Այո, կոռեկտության սահմաններում պետք է անեմ ամեն ինչ:

Կան տեղեկություններ, որ ռեյտինգային ընտրակարգով առաջադրվող ՀՀԿ-ականները արդեն իսկ ընտրակաշառք են բաժանում:

Դրանք ասեկոսեներ են, ես ասեկոսեների եւ պրովոկացիաների չեմ ենթարկվում:

Պարոն Առաքելյան, որոշումը` առաջադրվել ՀՀԿ ցուցակով, եղել է Սերժ Սարգսյանի՞ց:

Ստացել եմ նախագահի առաջարկությունը եւ հաճույքով ընդունել եմ:

Ինչպե՞ս եք պատկերացնում համագործակցությունը մի ուժի հետ, որին նախկինում դեմ եք եղել:

Ես երբեք որեւէ մեկին դեմ չեմ եղել:

Դուք ԲՀԿ-ից էիք, իսկ այդ կուսակցությունը գործող իշխանությանը դեմ էր:

Այլընտրանք էր:

Հետո ընդդիմություն դարձավ:

Երբ ընդդիմություն դարձավ, ես արդեն ԲՀԿ անդամ չէի:

Հարցազրույցը` Փայլակ Ֆահրադյանի