Մոտ մեկ ամիս առաջ Շիրակի պետական համալսարանի դասախոսներ Գագիկ Համբարյանն ու Հովհաննես Խորիկյանը բարձրաձայնել էին Շիրակի համալսարանի ռեկտոր, Շիրակի մարզի ՀՀԿ կառույցի ղեկավար Սահակ Մինասյանի՝ համալսարանի բյուջեն անարդյունավետ տնօրինելու մասին: Araratnews.am-ն այսօր Գագիկ Համբարյանից հետաքրքրվեց՝ ԿԳ նախարարությունը որեւէ կերպ արձագանքել ու ընթացք տվե՞լ է դասախոսների բողոքին: Գագիկ Համբարյանի խոսքով՝ հավանաբար, ԿԳ նախարարությունը սպասում էր ՏԻՄ ընտրությունների ավարտին. «Սպասում ենք ԿԳ նախարար Լեւոն Մկրտչյանի արձագանքին»:
Հիշեցնենք՝ երեկ Հայաստանի մի շարք համայնքներում ՏԻՄ ընտրություններ են եղել: Շիրակի մարզում ՀՀԿ-ական Թորգոմ Սահակյանը պարտվել է, իսկ Ախուրյանում հաղթել է ՀՅԴ թեկնածուն, ում սատարել է ՀՀԿ-ը, ըստ լուրերի, այլընտրանք չունենալով:
Araratnews.am-ը Սահակ Մինասյանից հետաքրքրվեց՝ ԿԳ նախարարության ուսումնասիրության արդյունքները համալսարանում ի՞նչ արդյունք են տվել: Ռեկտորը հորդորեց հարցն ուղղել ԿԳ նախարարություն:
Այսօր ԱԺ-ում 2018-ի բյուջեի նախագծի քննարկումից հետո Araratnews.am-ը ԿԳ նախարար Լեւոն Մկրտչյանից հետաքրքրվեց Շիրակի պետական համալսարանում ստուգումների մասին: Ի պատասխան նախարարն ասաց. «Մեր ուսումնասիրության արդյունքներն ուղարկել ենք համալսարան, որից հետո համալսարանի գիտական խորհուրդը կտա իր եզրակացությունը: Ինձ համար անհասկանալի է, որ ոչ մի դասախոս վերջին 6-7 տարվա ընթացքում չի ընտրվել, այլ նշանակվել է 6 ամսով»:
Մանրամասները՝ տեսանյութում:
Սոնա Դավթյան
