Օրերս ՀՀ առողջապահության նախարար Լեւոն Ալթունյանը «Ազատություն» ռադիոկայանի ֆեյսբուքյան ասուլիսի ընթացքում, անդրադառնալով «Գարդասիլով» պատվաստումների վերաբերյալ քաղաքացիներից մեկի հարցին, թե ինչո՞ւ հենց 13 տարեկան աղջիկներին են պատվաստում, եւ 13 տարեկանում արժի՞ երեխային պատվաստել, այս բացատրությունն էր տվել. «13 տարեկանում պատվաստելու տրամաբանությունը հիմնականում այն է, որ պատվաստումը պետք է կատարվի մինչեւ աոաջին սեռական փորձը… Հայաստանի տարածքում հարցումները ցույց են տալիս, որ մինչեւ 15 տարեկան աղջիկների 25 տոկոսն արդեն ունի այդ փորձը»:
Նախարարի այս պատասխանը մի շարք հարցեր է առաջացնում։ Նախ` սա ծանր հանցագործության մասին հաղորդագրություն է: Նկատի ունենք, որ մինչեւ 15 տարեկան, այսինքն` անչափահաս աղջկա հետ սեռական հարաբերությունը, անգամ նրա համաձայնության դեպքում, համարվում է հանցագործություն: Սրանով պետք է զբաղվեն իրավապահները։
Araratnews.am-ը ՀՀ առողջապահության նախարարի մամուլի խոսնակ Անահիտ Հայթայանից փորձեց ճշտել, թե ինչ հարցումների հիման վրա է նախարարը նման տոկոս հրապարակել։ «Մեկ ժամ տևողությամբ ֆեյսբուքյան ասուլիսի ընթացքում բանախոսին միաժամանակ երկու հարց է տրվել։ Անանուն տարբեր հարցումներ են արվել։ Համաձայն Արաբկիր ԲՀ-ի հարցման մինչեւ 15 տարեկան տղաների 25 տոկոսն է ասել՝ այո, մինչեւ 15 տարեկանը սեռական հարաբերություն ունեցել եմ, իսկ աղջիկների մեկ տոկոսն է դրական պատասխան տվել։ Ավելի վաղ կատարված մեկ այլ հարցման արդյունքներով նույն տարիքի տղաների 50 տոկոսն է ասել, որ մինչև 15 տարեկանը սեռական հարաբերություն է ունեցել։ Այս դեպքում ստացվում է, որ այդ տարիքի երեխաների շրջանում միջինում ստացվում է 25 տոկոս։ Ահա այս երկու 25 տոկոսն է սխալմամբ նշվել որպես աղջիկների շրջանում»,- ասաց Անահիտ Հայթայանը։ Նա նշեց, որ հարցումն իրականացվել է 2010 թվականին «Արաբկիր» բժշկական կենտրոնի կողմից։ «Ուղղակի շփոթմունք է»,- ասաց մամուլի խոսնակը, հավելելով, որ ոչ թե գինեկոլոգիական հետազոտություն է արվել, այլ անանուն հարցում։ Բացի այդ, հարցումներն անցկացվել են շուրջ 7 տարի առաջ, եւ, հետեւաբար, թվերը այս պահին կարող են փոփոխության ենթակա լինել։
Նշենք, որ համաձայն Հայաստանի դպրոցահասակ երեխաների առողջության վարքագծի 2013-2014 թթ. ազգային հետազոտության արդյունքների վերլուծության` 15 տարեկան հարցվածներից 21 տոկոս տղաները և 1 տոկոս աղջիկներն արդեն իսկ ունեցել են սեռական հարաբերություն:
Փայլակ Ֆահրադյան
