Եվրոպա լիգայի ընթացիկ խաղարկության 1/16 եզրափակչի պատասխան խաղում Լոնդոնի «Արսենալը» «Էմիրեյթսում» 1:2 հաշվով պարտվել է «Էստերսունդին»: Առաջին խաղում լոնդոնյան թիմը 3:0 հաշվով հաղթանակ էր տարել, այդպիսով երկու խաղերի արդյունքում կարողացել է ապահովել հաջորդ փուլի ուղեգիրը:
Հայաստանի ազգային հավաքականի կիսապաշտպան Հենրիխ Մխիթարյանն «Արսենալի» մեկնարկային կազմում է դուրս եկել խաղադաշտ և մասնակցել է ամբողջ խաղին:
Ըստ «Whoscored»-ի կազմած վիճակագրության` հայ ֆուտբոլիստը ոչ մի հարված չի կատարել դարպասին, բայց աչքի է ընկել 53 փոխանցմամբ, որոնցից երկուսը` սրող (63% ճշգրտությամբ):
Մխիթարյանը, ով 88-րդ րոպեին նաև զգուշացվել է դեղին քարտով, ստացել է 6,6 գնահատականը:
«Արսենալի» գլխավոր մարզիչ Արսեն Վենգերը «Էստերսունդից» կրած պարտությունից հետո մեկնաբանել է Մխիթարյանի խաղը. «Միկին շատ տքնաջան աշխատեց, նա լավ հանդիպում էր անցկացրել «Էստերսունդի» դեմ անցած շաբաթ: Նա դանդաղ է հարմարվում թիմին, բայց, ընդհանուր առմամբ, դրական խաղ անցկացրեց»,- ասել է Վենգերը:
