Microsoft ընկերությունը ճանաչվել է ԱՄՆ-ի ամենաազդեցիկ ապրանքանիշը: Ինչպես տեղեկացնում է ComputerWorld կայքը, այս ցուցանիշով Microsoft-ը գերազանցել է Apple-ին, ով վարկանշային աղյուսակում երկրորդն է:
Forrester Research-ի ներկայացուցիչների խոսքերով` 2013 թվականին Microsoft-ին հաջողվել է զգալի ամրապնդել իր դիրքերը և ստանալ գնորդների վստահությունը: Դրան նաև նպաստել է «One Microsoft» գովազդային շարքը: Փորձագետները նշում են, որ շատ ցուցանիշներով Apple-ը հավասար է Microsoft-ին, սակայն զիջում է հիմնական ցուցանիշով` «անհրաժեշտությամբ» (Essentials): Forrester Research-ի փորձագետ Թրեյսի Սթոուքսը հայտարարել է, որ Apple-ը շատերի մոտ ասոցացվում է բարձր որակի և գերազանց սպասարկման հետ, սակայն նրա սարքերն այլևս այնքան կարևոր չեն, որքան Բիլ Գեյթսի հիմնադրած ընկերության սարքերն ու ծառայությունները:
Հիշեցնենք, որ 2013 թվականի սեպտեմբերից Apple-ն աշխարհի ամենաթանկ ապրանքանիշն է:
