Մեծ Բրիտանիայի արտաքին գործերի նախարարությունը իր կայքում հայտարարություն է տեղադրել, որում ասվում է, որ Թուրքիայում ահաբեկչական հարձակումների իրականացման հավանականությունը դեռ շարունակում է բարձր մնալ:
Ըստ թուրքական Birgun թերթի կայքի՝ Մեծ Բրիտանիայի արտգործնախարարության ճամփորդությունների վերաբերյալ զգուշացումների բաժնում Թուրքիայի հետ կապված ասվում է, որ թեև թուրքական իշխանությունները ահաբեկչության դեմ պայքարում արդյունավետ քայլեր են ձեռնարկում, բայցևայնպես ահաբեկչության վտանգը այդ երկրում դեռևս չի նվազել:
Հիշեցվում է նաև, որ Թուրքիայում 2016 թ. հուլիսի 15-ին տեղի ունեցած ռազմական հեղաշրջման փորձից հետո իրավիճակը երկրում թեև համեմատաբար խաղաղվել է, սակայն դեռ կան անվտանգության որոշակի հարցեր: Բացի այդ էլ, Թուրքիայում շարունակվում է գործել արտակարգ դրությունը:
Բրիտանիայի արտգործնախարարությունը զգուշացնում է, որ Թուրքիայում հնարավոր ահաբեկչական գործողությունները կարող են թիրախավորել օտարերկրյա քաղաքացիներին:
