Այսօր Ազգային Ժողովում եռյակըˋ ՀԱԿ-ը, ԲՀԿ-ն և Ժառանգությունը, հրավիրված նիստին քննարկել են մի քանի հարց:
«Ժառանգություն» խմբակցության ղեկավար Ռուբեն Հակոբյանը հայտնեց, որ անդրադարձել են առաջիկա մարզային այցելություններին և ամփոփել Կառավարությանը ներկայացրած 12 կետի շուրջ իրենց գնահատականը:
«Քննարկել ենք նաև հոկտեմբերի 10-ի հանրահավաքի օրակարգը»,- ասաց Ռուբեն Հակոբյանը:
Այն հարցին, թե հանրահավաքին կուսակցությունների առաջնորդները մասնակցելու են, պարոն Հակոբյանն ասաց, որ դեռ քննարկում են այդ հարցը:
Անդրադառնալով այն հարցին, թե հնարավոր է, որ մինչ հանրահավաքը եռյակը կորուստներ ունենա, Ռուբեն Հակոբյանն ասաց, որ իրենք կորուստներ չունեն:
«ՀՅԴ-ն չի հայտարարել, որ մեզ լքում է: Առաջիկա նիստին ՀՅԴ-ն ևս կմասնակցի, և կքննարկենք կառավարությանը ներկայացրած 12 կետերի հարցը: Չեմ կարծում, որ կորուստներ կունենանք»,- ընդգծեց Հակոբյանը:
