Մանր ժուլիկություն. ՀՀԿ-ն փոխե՞լ է «Ելքի» քվեաթերթիկները (տեսանյութ)

Ազգային ժողովում այսօր տեղի ունեցած ընտրություններում Բարձրագույն դատական խորհրդի անդամների բոլոր թեկնածուներն ընտրվեցին։ ԱԺ հաշվիչ հանձնաժողովի նախագահ Գագիկ Մելիքյանը ԱԺ ամբիոնից ներկայացրեց քվեարկության արդյունքները։ Հիշեցնենք, որ Գագիկ Հարությունյանին ընտրել է 96 պատգամավոր, 2 պատգամավորներ են միայն դեմ եղել նրա թեկնածությանը։ Երկրորդ տեղի համար թեկնածու Գևորգ Դանիելյանին կողմ քվեարկել է 90 պատգամավոր, դեմ՝ 7, Լիպարիտ Մելիքջանյանին կողմ քվեարկել է 82 պատգամավոր, դեմ են եղել 15-ը, մյուս թեկնածու Հայկ Հովհաննիսյանին կողմ քվեարկել է 86 պատգամավոր, դեմ՝ 11, Սերգեյ Մեղրյանին կողմ քվեարկել է 87, դեմ` 10: Քվեարկության արդյունքների հրապարակումից հետո ԲԴԽ ընտրված անդամները երդվեցին իրենց պարտականությունները կատարել Սահմանադրությանն ու օրենքներին համապատասխան։

Քվեարկության արդյունքները հրապարակելուց հետո վարման կարգով ելույթ ունեցավ ԱԺ «Ելք» խմբակցության ղեկավար Նիկոլ Փաշինյանը: Նա հայտարարեց, որ վստահորեն կարող  է պնդել, որ իրենց խմբակցության յոթ պատգամավորները դեմ են քվեարկել Գագիկ Հարությունյանի եւ Գեւորգ Դանիելյանի թեկնածությանը: Փաշինյանը արդյունքների՝ այս պատկերով հրապարակումը համարեց իշխանության կողմից մանր ժուլիկություն, քաղաքական հեռուն գնացող նպատակներով արված քայլ` ուղղված «Ելք» դաշինքին:

Արձագանքեց հաշվիչ հանձնաժողովի նախագահ Գագիկ Մելիքյանը, նշելով, որ հանձնաժողովի բոլոր անդամները ստորագրել են արձանագրության տակ: Նշենք, որ այս հանձնաժողովի անդամ է «Ելք» դաշինքից Լենա Նազարյանը: Վերջինս եւս խոսեց, ասելով, որ իր համար վերջնական արդյունքը պարզ չի եղել, եւ հնարավոր է` դեմ քվեաթերթիկները փոխվել են:

Վարման կարգով ելույթ ունեցավ ԱԺ ՀՀԿ խմբակցության ղեկավար Վահրամ Բաղդասարյանը: Նա հայտարարեց, որ ոչ Գագիկ Հարությունյանի եւ ոչ էլ մյուս անդամների համար էական չէ, թե քանի ձայնով են ընտրվել, և հորդորեց նման խլրտումներ չմտցնել ԱԺ բնականոն աշխատանքի մեջ:

Ելույթ ունեցավ նաեւ «Ծառուկյան» խմբակցության պատգամավոր Նաիրա Զոհրաբյանը: Նա նշեց, որ  հաշվիչ հանձնաժողովի անդամների վերաբերյալ որեւէ կասկած չկա, հետեւաբար առաջարկում են վերահաշվարկ կատարել:

Փաշինյանը դարձյալ կրկնեց, որ անհրաժեշտ է քվեաթերթիկների հաշվարկը դռնբաց կատարել:

Փայլակ Ֆահրադյան