Լեռնային Ղարաբաղի Հանրապետությունում մայիսի 3-ին կայանալիք խորհրդարանական ընտրություններին պատգամավորի 33 մանդատի համար կպայքարի 206 թեկնածու: Մեծամասնական կարգով 11 մանդատի համար առաջադրվել է 42 թեկնածու: Համամասնական կարգով 22 մանդատի համար առաջադրվել են 7 կուսակցության 164 թեկնածու:
«Արմենպրես»-ի փոխանցմամբ՝ մայիսի 2-ին Ստեփանակերտում կայացած ասուլիսի ժամանակ նման տեղեկատվություն տրամադրեց ԼՂՀ ԿԸՀ նախագահ Սրբուհի Արզումանյանը: Նա նշեց, որ նախորդ ընտրությունների համեմատ թեկնածուների թիվը կրկնապատկվել է, ավելացել է նաև կանանց թիվը: Այս տարի ընտրություններն կմասնակցի 101.653 ընտրող:
«Մենք կարևորում ենք ձգտումն՝ անցկացնել միջազգային չափանիշների ընտրություններ, և կարծում ենք, որ դրա համար անհրաժեշտ է ինչպես քաղաքական կամք, այնպես էլ իրավական դաշտի անընդհատ կատարելագործում: Ընտրական օրենգիրքը փոփոխության է ենթարկվել և ընդունվել են ավելի քան 70 որոշումներ»,- ասաց նա՝ շեշտելով, որ նոր օրենսգրքով կրճատվել են եծամասնական կարգով պատգամավորների տեղերը: Համամասնական ցուցակում ընդգրկվող թեկնածուների նվազագույնը թիվը 5-ն է, առավելագույնը` 60-ը:
Ընտրությունների համար առավոտվանից կգործեն 279 տեղամասային ընտրական հանձնաժողովներ. դրանցից մեկը գտնվոմ է Երևևանում, ևս մեկը ՔԿՀ-ում:
Հանձնաժողովների 2500 ներկայացուցիչների համար անցկացվել է մասնագիտական դասընթաց:
Մայիսի 3-ին ԼՂՀ-ում կանցկացվեն խորհրդարանական ընտրություններ: Այսօր` մայիսի 2-ին ԼՂՀ-ում լռության օր է:
