Ռուսական Lenta.ru կայքը ներկայացնում է ԱՊՀ տարածքի բանակները: Այս անգամ կայքի հեղինակները ռեպորտաժ են հրապարակել Հայաստանի և Լեռնային Ղարաբաղի բանակների վերաբերյալ: Հետաքրքիր է, որ ռուսական հրատարակությունը մեր երկու պետությունների բանակները ներկայացրել է միասին` չվախենալով ադրբեջանական հերթական հիսթերիայից:
Կայքը պատմում է, որ հայկական բանակի հիմքը կազմել են կամավորական ջոկատները, որոնք ստեղծվել են 90-ականների սկզբին՝ Հայաստանի և Արցախի ժողովրդի անվտանգությունն ապահովելու համար: Նշվում է, որ հայկական բանակի համար ամենալուրջ փորձությունը ղարաբաղյան պատերազմն էր, ինչի արդյունքում Արցախը ստացավ անկախություն, թեպետ չի ճանաչվել աշխարհի կողմից:
Lenta.ru-ն մեջբերում է Արցախի նախագահ Բակո Սահակյանի` հունվարի 28-ին ասված այն խոսքերը, որոնց համաձայն` «հայկական բանակն ամենամարտունակն է և կազմակերպվածը տարածաշրջանում, որ դա արդեն անհերքելի իրականություն է և մեր ժողովրդի ամենանշանակալի ձեռքբերումներից մեկը»:
