Հայկական Վերածնունդ սփյուռքյան կազմակերպությունը խստորեն դատապարտում է Ադրբեջանի սանձազերծած լայնածավալ հարձակումը Արցախի պաշտպանական դիրքերի և խաղաղ բնակչության վրա:
Մեր բոլոր մասնաճյուղերի կողմից խորին ցավակցություն ենք հայտնում ալիևյան ագրեսիայի զոհ դարձած երիտասարդ զինվորականների և խաղաղ բնակիչների ընտանիքներին:
Միաժամանակ հպարտանում ենք հայ զինվորի արիությամբ և մեր խորին երախտագիտությունն ու զորակցությունն ենք հայտնում Հայոց Բանակին՝ ադրբեջանական ոտնձգությունները խիզախորեն դիմակայելու և ետ մղելու համար:
Ադրբեջանի վարած հայատյաց և ագրեսիվ քաղաքականությունը, պետական ամենաբարձր մակարդակով քարոզվող քսենոֆոբիան, հայ ժողովրդի պատմությունը կեղծելու և յուրացնելու պետական քաղաքականությունը, և Հայաստանը ոչնչացնելու մոլուցքը արդեն անխուսափելի էին դարձրել լայնածավալ պատերազմի հեռանկարը: Քաղաքացիական բնակչության թիրախավորումը և տարեց բնակիչների դաժան սպանության դեպքերը մեզ հիշեցնում են, որ գործ ունենք ոչ թե քաղաքակիրթ պետության, այլ ոճրագործ ռեժիմի հետ, որն իր բարբարոս գործելակերպով չի զիջում Իսլամական Պետության ահաբեկիչներին: Վերջին իրադարձությունները ևս մեկ անգամ ապացուցում են, որ Արցախը չի կարող որևիցե կարգավիճակով ընդգրկվել Ադրբեջանի կազմում, ուստիև այդ ուղղությամբ միջազգային հանրության վարած միջնորդական գործունեությունը տանում է ոչ թե խնդրի լուծման, այլ փակուղու և ինչպես արդեն համոզվեցինք՝ Ադրբեջանի ագրեսիային:
Միևնույն ժամանակ տեսնում ենք, որ եթե մինչ այսօր Հայաստանի իշխանությունների վարած զգուշավոր և նույնիսկ երկչոտ արտաքին քաղաքականությունը կարելի էր ինչ որ կերպ արդարացնել պատերազմից խուսափելու պահանջով, ապա այսօր այն ոչ միայն Արցախի հիմնախնդիրը չի լուծել, այլ փաստորեն նաև խաղաղություն չի ապահովել: Հայկական Վերածնունդը եղել և մնում է այն համոզմանը, որ Արցախի հիմնախնդրի միակ և վերջնական լուծումը Հայաստանի հետ միավորվելն է: Գտնում ենք, որ ժամանակը հասունացել է Հայաստանի Հանրապետության արտաքին քաղաքականությունը վերանայելու և ավելի սկզբունքային և ինքնավստահ քաղաքականություն որդեգրելու:
Մասնավորապես՝ ինչպես պաշտոնապես մի քանի անգամ հայտարարվել է ՀՀ իշխանությունների կողմից, Ադրբեջանի ագրեսիայի դեպքում Հայաստանը կճանաչի Արցախի անկախությունը: Համոզված ենք, որ այդ պահը եկել է: ՀՀ իշխանությունները պետք է անհապաղ ճանաչեն Արցախի անկախությունը, և արտաքին քաղաքականությունը ձևավորեն Հայաստանի Հանրապետության և Արցախի վերամիավորման ուղղությամբ: Վրդովմունքով ենք ընդունում միջազգային հանրության և լրատվական միջոցների՝ արդեն վաղուց կիրառվող երկու կողմերին հավասարեցնելու քաղաքականությունը:
Նույնիսկ այն դեպքում, երբ Ադրբեջանը բացահայտ նախահարձակ է և այն չի թաքցնում՝ միջազգային հանրությունը կրկին մեղադրում է երկու կողմերին: Մենք սա համարում ենք Ադրբեջանի ագրեսիվ քաղաքականությունը խրախուսող հանգամանք, և գտնում ենք, որ միջազգային հանրության նման վերաբերմունքը ՀՀ դիվանագիտության բացթողման հետևանք է: Հայկական Վերածնունդը միանում է սփյուռքյան բոլոր կազմակերպություններին և կրկին անգամ իր զորակցությունն է հայտնում Արցախի սահմանները պաշտպանող Հայոց Բանակին:
Միաժամանակ կոչ ենք անում սփյուռքում գործող բոլոր կազմակերպություններին, կուսակցություններին և անհատ անձանց՝ օգտագործել իրենց երկրներում բոլոր հնարավոր լծակները՝ միջազգային հանրությանը ալիևյան ագրեսիայի ճշմարտությունը ներկայացնելու և մերժելու հարձակվողին և պաշտպանվողին հավասարեցնելու անընդունելի քաղաքականությունը: Այս ուղղությամբ պատրաստ ենք ամեն կերպ աջակցել և առաջարկում ենք մեր կազմակերպության համագործակցությունը:
Հայկական Վերածնունդ սփյուռքյան կազմակերպություն
