Ներկայացրել ենք այն խնդիրները, որոնք ենթակա են լուծման:
Այս մասին այսօր Ազգային Ժողովում լրագրողների հետ զրույցում ասաց ՀՀ աշխատանքի և սոցիալական հարցերի նախարար Արտեմ Ասատրյանըˋ անդրադառանալով «Ժամանակավոր անաշխատունակության մասին» օրենքին:
«Մեր նախագիծը առաջարկություն էր, մենք այս ընթացքում հանրային քննարկում ունեցանք բոլոր շահագրգիռ շրջանակների հետ, այդ թվումˋ շահառու անձանց, գործատուների, ՏԻՄ-երի, ՀԿ-ների հետ: Այն բոլոր հարցադրումները և առաջարկները, որոնք ներկայացվեցին, շատ առարկայական բնույթ էին կրում: Այժմ իրականացվում է դրանց վերլուծության և համապատասխան փոփոխությունների աշխատանքներ, որով իսկապես աշխատող հղի կինը, որը եկամուտ է ստանում, չունենա որևէ կերպ իրավունքի ոտնահարում»,-ասաց նախարարը:
Լրագրողների այն հարցին, թե երկարամյա աշխատող կինը, որը ստանում է 100 տոկոս աշխատավարձ, նույն ձև կստանա հետծննդյան նպաստ, նախարարը պատասխանեց.
«Նախագիծը վերջնական տեսքի ենք բերել, որը 2-3 օրից կներկայացվի Ազգային ժողովի սոցիալական հարցերով հանձնաժողովի քննարկմանը և այդ դեպքում մենք բոլոր հարցերին կունենանք վերջնական պատասխաններ»:
Լագրողների այն դիտարկմանը, թե վարչապետը մեղքը գցում է նախարարի վրա, Արտեմ Ասատրյանը ասաց, որ շատ սխալ տպավորություն է:
«Որովհետև այստեղ մեղք գցելու որևէ խնդիր չկա: Վարչապետը ներկայացրեց իր հստակ մոտեցումը խնդրի հետ կապված, քանի որ այս ընթացքում բազմաթիվ քննարկումներ են տեղի ունեցել և այս քննարկումները ենթադրում են արդեն որոշակի լուծումներ»,-ասաց Ասատրյանը:
Հիշեցնենք, որ երեկ Կառավարության նիստին վարչապետ Հովիկ Աբրահամյանը ասաց, որ օրենքը պետք է այնպես պատրաստվի, որ որևէ հղի կին չտուժի:
Իսկ այն հարցին, թե կարո՞ղ եք այնպես անել, որ վերջնական արդյունքում և վարչապետը գոհ մնա, և հղի կանայք, Արտեմ Ասատրյանը պատասխանեց, որ կկարողանան անել այնպիսի քայլեր, որպեսզի ընդհանրապես այն բոլոր անձինք, ովքեր առարկայական շահագրգռվածություն ունեն այս խնդրի ճիշտ հանգուցալուծման համար, ստանան իրենց խնդիրների լուծումները:
«Կարծում եմ վարչապետը, իր մոտեցումները հստակ ներկայացնելով, առաջին հերթին նկատի ունի այն շահառուներին, այն անձանց, որոնց խնդիրների լուծման ուղղությամբ էլ տարվում են կառավարության աշխատանքները»,-եզրափակեց Ասատրյանը:
