Araratnews.am-ի զրուցակիցն է Շիրակի արդեն նախկին մարզպետ ՀՅԴ անդամ Հովսեփ Սիմոնյանը:
Նշենք, որ Սիմոնյանը մարզպետի պաշտոնում նշանակվել էր նախորդ տարվա մարտի 3-ին: Նրան ուրբաթ օրը՝ հունիսի 2-ին, հրավիրել էին ՀՅԴ գերագույն մարմին եւ հայտնել, որ պաշտոնանկ է արվելու: Շիրակի մարզպետի պաշտոնում ՀՅԴ-ն առաջարկել է տարածքային կառավարման եւ զարգացման փոխնախարարին: Արթուր Խաչատրյանը, ամենայն հավանականությամբ, մարզպետի պաշտոնում կնշանակվի այս հինգշաբթի՝ Կառավարության նիստում:
Ներկայացնում ենք Հովսեփ Սիմոնյանի հարցազրույցը Araratnews.am-ին:
Պարոն Սիմոնյան, անակնկա՞լ էր ՀՅԴ-ի որոշումը, որ Ձեզ պաշտոնանկ են անելու:
«Պաշտոնանկ»-ը մի քիչ ուրիշ գաղափար է, կարելի է այս իրավիճակին այդ «պաշտոնանկ» բառը չօգտագործել, որովհետեւ ես լեզվի մասնագետ չեմ: Ոչ մի անգամ ինձ համար, ինչ պաշտոն էլ որ ես վարել եմ, անակնկալ չի եղել կուսակցության այս կամ այն որոշումը: Ես մի քիչ կարգապահ կուսակցական եմ, որովհետեւ գիտեմ, որ մի օր եթե նշանակել են, մի օր կարող են փոխել: Այնպես որ, յուրաքանչյուր պաշտոնյա իր աշխատանքի ընթացքում առավոտ պետք է արթնանա ու մտածի, որ կարող է իրան այսօր աշխատանքից հեռացնեն:
Ձեզ ներկայացվե՞լ են հեռացնելու պատճառները:
Պատճառ չկա հեռացնելու: Ինձ հրավիրել են գերագույն մարմին, շնորհակալություն հայտնել, որ ծանր ժամանակահատվածում պաշտոնավարել եմ Շիրակի մարզում, իմ աշխատանքից շատ գոհ են եղել եւ ասել են, որ աշխատանքի փոփոխություն կլինի, այլ աշխատանքի պետք է ուղարկեն ինձ
Ի՞նչ այլ աշխատանք է առաջարկվել Ձեզ:
Չգիտեմ, երբ որ առաջարկեցին` դուք էլ, ես էլ կիմանանք:
Նոր մարզպետին անձամբ ճանաչո՞ւմ եք:
Իհարկե ճանաչում եմ, շատ լավ անձնավորություն է:
Ինչո՞ւ ՀՅԴ-ն որոշեց երեւանցու գործուղել Շիրակի մարզ:
Ում էլ բերեին, պիտի ասեիք` ինչո՞վ է պայմանավորված:
Գոնե մարզի բնակիչը ավելի շատ է տեղեկացված մարզի խնդիրներից:
Քանի՞ մարզպետ ենք ունեցել: Ես 7-րդն էի, հիմա կգա ութերորդը, նրանց բոլորին կարելի էր նույն հարցը տալ, Փիրումյանը, Գիզիրյանը այստեղից չէին: Իրան են նպատակահարմար գտել: Կարող է ինձ համար այլ, ավելի լավ աշխատանք են գտել:
Կան տեղեկություններ, որ պաշտոնանկ անելու պատճառներից մեկն էլ այն է, որ ընտրությունների ժամանակ ՀՅԴ-ին բավարար թվով ձայներ չեք բերել:
Բացառված է, ամենաբարձր ցուցանիշը կուսակցական մակարդակով տրվել է Շիրակի մարզից, եւ ընդհանրապես, քննարկում եղել է, եւ շատ շնորհակալ են եղել իմ կուսակցական աշխատանքից:
Հարցազրույցը՝ Փայլակ Ֆահրադյանի
