Ինչպես ավելի վաղ տեղեկացրել էինք, այսօր 12:30-ին, կառավարության շենքի առջեւ մի խումբ մտահոգ քաղաքացիներ անցկացնելու էին բողոքի ակցիա «Ժամանակավոր անաշխատունակության նպաստների մասին» ՀՀ օրենքում փոփոխություններ մտցնելու օրինագծի դեմ: Araratnews.am-ի լրագրողն այս պահին տեղեկացնում է, որ մի խումբ մտահոգ անձիք, որոնց թվում են նաև հղի կանայք, Կառավարության շենքի մոտ են և բարձրացնում են «Ժամանակավոր անաշխատունակության նպաստների մասին» ՀՀ օրենքում փոփոխություններ մտցնելու օրինագծի դեմ իրենց դժգոհությունները:
Ցուցարարների կարծիքով Կառավարության կողմից հավանության արժանացած օրինագծի ուժի մեջ մտնելու դեպքում խիստ կրճատվելու է աշխատող կանանց մինչծննդաբերական և հետծննդաբերական փոխհատուցման չափը և դրվելու է մայրության նպաստի վերին շեմ: Նրանք նշում են, որ սույն օրինագիծը խախտում է ՀՀ Սահմանադրության մի շարք հոդվածներ և միջազգային նորմեր: Նախաձեռնության անդամները վստահ են, որ օրինագծով սահմանված փոփոխությունները աշխատող կանանց իրավունքների ոտնահարում են: Բացի այդ, փոփոխությունները կարող են հանգեցնել ծնելիության կրճատման և նպաստել արտագաթին: Նախաձեռնության անդամները ողջունում են կառավարության՝ չաշխատող կանանց ծննդաբերության նպաստ վճարելու գաղափարը, սակայն գտնում են, որ այդ փոփոխությունները չպետք է արվեն աշխատող կանանց հաշվին:
Մանրամասները՝ քիչ անց տեսանյութով:
