Այսօր խորհրդարանում «Լուսավոր Հայաստան» խմբակցության ղեկավար Էդմոն Մարուքյանն անդրադարձավ ՀՀ նախագահ Արմեն Սարգսյանի կողմից Սահմանադրական դատարանի դատավորի թափուր տեղի համար առաջադրված Գոռ Հովհաննիսյանի թեկնածությանը։ Այս մասին հաղորդում է Shantnews.am-ը:
Լրագրողի այն հարցին՝ չի՞ կարծում արդյոք Մարուքյանը, որ ՀՀ նախագահը պետք է կրկին առաջադրեր Վահե Գրիգորյանի թեկնածությունը զուտ այն պատճառով, որ նրա թեկնածությունը չի քննարկվել՝ քվորումի բացակայության պատճառով, «Լուսավոր Հայաստան» խմբակցության ղեկավարն ասաց․ «ՀՀ նախագահն անկախ պաշտոնյա է: Նախագահն է որոշում՝ ում ներկայացնի: Ես ինձ չեմ համարում լիազորված կամ ինձ թույլ չեմ տա նախագահին խորհուրդ տալ, թե ում պետք է ներկայացներ: Նախագահը ներկայացրել է նրան, ում որ պետք է ներկայացներ»,- ասաց Մարուքյանը՝ հավելելով, որ Վահե Գրիգորյանին ճանաչում է, բայց առաջադրված թեկնածու Գոռ Հովհաննիսյանին՝ ոչ:
Մարուքյանն ասաց, որ նախագահի կողմից Գոռ Հովհաննիսյանի թեկնածությունն առաջադրելու հարցում քաղաքական ենթատեքստ չի տեսնում, երեք թեկնածուներից նախագահն ընտրել է Հովհաննիսյանին: Սահմանադրությամբ ՍԴ անդամի թեկնանածու ներկայացնելու հերթը նախագահինն է, հաջորդը՝ կառավարությանը: Հաջորդ անգամ կառավարությունը կարող է ներկայացնել նրան, ում կամենա:
