Վրաստանում երեկ քաղաքական լարված իրավիճակ էր Վրաստանի քաղաքացիները երեկ ընդդիմության հետ փորձել են մտնել խորհրդարան, սակայն ոստիկանությունը արցունքաբեր գազով, ռետինե փամփուշտներով ցրել է ցուցարարներին:
Հիշեցնենք՝ Վրաստանի խորհրդարանի պատգամավորները երեկ խափանել են Ուղղափառության միջխորհրդարանական վեհաժողովի աշխատանքները։ Ռուս պատգամավորների ներկայությունը միանշանակ չի ընդունվել Վրաստանի խորհրդարանականների կողմից, նրանք իրենց բողոքի ձայնն են բարձրացնել ռուս պատգամավորների մասնակցության առնչությամբ:
Վրաստանի նախագահ Սալոմե Զուրաբիշվիլին երկրում անկայունություն առաջացնելու համար մեղադրել է Ռուսաստանին: Վրացագետ Ջոնի Մելիքյանը, սակայն, Araratnews.am-ի հետ զրույցում այդ հայտարարությունը համարեց ոչ ադեկվատ:
Նրա խոսքով՝ Վրաստանի իշխանությունը փորձում է իր սխալները ինչ-որ մեկին վերագրել, որը վտանգավոր է:
Ջոնի Մելիքյանի կարծիքով՝ Ռուսաստանը ոչ մի կապ չունի երեկվա իրադարձությունների հետ: «Սա զուտ ներքաղաքական պայքար է: Առաջին դեպքը չէ: Անցյալ տարի եւս աղմուկ բարձրացավ, ակցիաներ տեղի ունեցան, որից օգտվեցին եւ հիմա էլ օգտվում են ընդդիմադիր քաղաքական ուժերը»,- նշեց փորձագետը:
Փորձագետը հիշեցրեց՝ Վրաստանի ընդդիմադիրները գիտեին, որ միջոցառմանը ռուսներ են մասնակցելու, վեհաժողովի նախագահն էլ նստելու է ԱԺ դահլիճում խորհրդարանի ղեկավարի աթոռին: Հետևաբար, ընդդիմադիրները պարզապես փորձեցին օգտվել այս իրավիճակից, հրահրեցին, ցանկացան խորհրդարանի շենքը գրավել, ոստիկաններն էլ հատուկ միջոցներ կիրառեցին: «Իրավիճակը հիմա կառավարելի է, բայց այսօր՝ ժամը 7-ին, բողոքի ցույցեր կլինեն: Եթե իշխանությունը, իրավապահները աշխատեն իրենց լիազորությունների սահմանում, կկարողանան իրավիճակը կառավարելի պահել, սառեցնել ներքաղաքական պայքարը, իսկ եթե ոչ՝ ապա ներքաղաքական ճգնաժամը կխորանա»,- կարծում է մեր զրուցակիցը:
Ջոնի Մելիքյանը կարծում է՝ երեկ հայաստանյան խորհրդարանական պատվիրակության դուրս գալը Վրաստանի խորհրդարանի դահլիճից ճիշտ էր, քանի որ միջոցառումը հետո չեղյալ համարվեց: «Հայաստանին ձեռնտու է Վրաստանի կայունությունը, քանի որ այնտեղ ունենք համայնք, ունեն դարավոր հարաբերություններ եւ Վրաստանով ենք ներմուծում եւ արտահանում»,- ավարտեց իր խոսքը վրացագետը:
Սոնա Դավթյան
