Երեկ` մայիսի 3-ին, «Էրեբունի» բժշկական կենտրոնում ծնված հնգյակին շարունակում են միացված մնալ արհեստական շնչառության սարքերը:
Ինչպես araratnews.am-ին հայտնեցին «Սուրբ Աստվածամայր» բժշկական կենտրոնից, իրենց մոտ գտնվող հնգյակից մեկի վիճակն այս պահին կայուն է, վատացում չկա. «Դե, առայժմ կայուն է, որովհետև այս քաշի երեխային դժվար է դիագնոզ տալ, մեկ օրվա ընթացքում ամեն դեպքում վատացում չկա: Այս պահի դրությամբ նորմալ է, բայց դա չի նշանակում, որ ամեն ինչ կարող է նորմալ վերջանալ, որովհետև պետք է հետևենք, բուժենք, շատ երկարատև աշխատանք է: Այսօր կարող է փորձենք փոխել ապարատի ձևը, դեպի ինքնուրույն շնչառություն. եթե ստացվեց` ստացվեց, եթե ոչ` նորից հետ կվերադառնանք»,- նշեց բժշկական կենտրոնի աշխատակիցը:
«Մուրացան» հիվանդանոցից էլ, որտեղ գտնվում են փոքրիկներից երկուսը, տեղեկացրին, որ նրանց վիճակը շարունակում է ծայրահեղ ծանր մնալ: Բժշկական կենտրոնի աշխատակիցը մեզ հետ զրույցում նշեց. «Երկուսի վիճակն էլ նույնն է, շարունակում է ծանր մնալ, որովհետև երկուսն էլ խոր անհաս են, ապարատային շնչառության տակ և շատ մեծ վտանգների առաջ են: Կարծում եմ` այս պահին բոլոր հինգին էլ վտանգ է սպառնում, որովհետև խոր անհաս երեխաներ են և շատ վտանգավոր կատեգորիայի հիվանդների մեջ են մտնում»:
«Էրեբունի» բժշկական կենտրոնի մամուլի քարտուղար Շուշան Հունանյանն էլ նշեց, որ բոլոր հինգն էլ նույն վիճակում են` կայուն ծանր:
Հիշեցնենք, որ Երևանում երեկ առավոտյան ժամը 04։00-ին «Էրեբունի» բժշկական կենտրոնում լույս աշխարհ էր եկել հնգյակ` 4 աղջիկ և 1 տղա։
