Մինչ Երեւանի քաղաքապետարանը պարբերաբար թմբկահարում է Հին Երեւանի վերականգնման մասին, զուգահեռ՝ Երեւանի տարիների պատմություն ունեցող կառույցները հյուրանոց դառնալու վտանգի առաջ են: Հերթը կարծես թե հասել է Գիտությունների ազգային ակադեմիայի շենքին:
Շաբաթներ առաջ «Ծառուկյան» դաշինքի պատգամավոր Սերգեյ Բագրատյանն ասել էր, որ ԳԱԱ-ի շենքը քանդելու են եւ տեղում հյուրանոց կառուցեն: Araratnews.am-ի հետ զրույցում ԳԱԱ-ի ղեկավար Ռադիկ Մարտիրոսյանը պատգամավորի հայտարարությունը հնարած խոսակցություն է համարում. «Չգիտեմ՝ այդ պատգամավորը որտեղից է այդ տեղեկությունը ստացել, բայց այդպիսի բան չի կարող լինել»:
Ճարտարապետների միության նախագահ Մկրտիչ Մինասյանն էլ հռետորական հարց է տալիս՝ մենք ինչ-որ բաներ պետք է պահե՞նք, թե՞ ոչ. «Չեմ կարծում, որ ԳԱԱ-ի շենքը պետք է քանդվի»:
Ճարտարապետին հիշեցրինք՝ տարիներ առաջ Հրաչյա Աճառյանի անվան լեզվի ինստիտուտի շենքը քանդվեց, հետեւաբար, ո՞րն է երաշխիքը, որ նույն բախտին չի արժանանա նաև ԳԱԱ-ի շենքը: «Լեզվի ինստիտուտի շենքը չամբողջացավ, չեղավ այն, ինչ ուզում էին, չնայած կարելի էր պահել: Իսկ ակադեմիայի դեպքում խնդիրն այլ է: Այն հենց նախատեսված է գիտությամբ զբաղվելու համար»:
Եթե կառավարությունը որոշի ԳԱԱ-ի շենքն էլ քանդել, Մկրտիչ Մինասյանի խոսքով՝ դա կնշանակի, որ գիտությունը մեզ պետք չէ:
Հ.Գ. Վարչապետ Կարեն Կարապետյանն այս տարվա սկզբին Հանրային խորհրդի հետ հանդիպմանն անդրադարձել էր Գիտությունների ազգային ակադեմիան ճիշտ եւ պրակտիկ օգտագործելուն: Թեեւ ԳԱԱ-ի շենքը քանդելու մասին հստակ խոսակցություն չի եղել, սակայն եթե հաշվի առնենք, որ կառավարությունը պատգամավորի հայտարարությանը չի անդրադարձել, ու հիշենք, թե ինչպես Երեւանի պատմամշակութային որոշ կառույցներ сарай-ի անվան տակ ոչնչացվեցին հյուրանոց դառնալու ակնկալիքով, չենք զարմանա, եթե ԳԱԱ-ի շենքն էլ այդ բախտին արժանանա: Չմոռանանք, որ կառավարությունը մոտ 3 տասնյակ շենք-շինությունների մասնավորեցման հարցն է դրել, հավանաբար, բյուջե լցնելու նպատակով:
Սոնա Դավթյան
