Ամիսներ առաջ մեծ աղմուկ առաջացրած «Սպայկա» ընկերության գործով նախաքննությունը շարունակվում է: Այս մասին Araratnews.am-ը տեղեկացավ ընկերության զարգացման գծով տնօրեն Կարեն Բաղդասարյանից:
Թե ինչ փուլում է նախաքննությունը, Բաղդասարյանը տեղյակ չէր: Նա հիշեցրեց՝ երկու այլ ընկերությունների հարկային պարտավորություն չկատարելը ցանկանում են «փաթաթել «Սպայկայի» վզին»:
Ընկերության փաստաբան Սամվել Սիմոնյանն էլ մեզ հետ զրույցում մանրամասն տեղեկություն չհայտնեց նախաքննության ընթացքից: Միայն ասաց. «Այն, ինչ կա մամուլում, դա է: Ավելացնելու ոչ մի բան չունեմ»:
Կարեն Բաղդասարյանն ասաց, որ ընկերությունը շարունակելու է պտուղ-բանջարեղենի մթերման աշխատանքները, որոնք սկսվելու են մի քանի օրից:
Հիշեցնենք՝ ՊԵԿ հաղորդագրության համաձայն՝ «Սպայկա» ընկերությունը պետական բյուջե չի վճարել ընկերության կողմից իրականացված ձեռնարկատիրական գործունեության արդյունքում առաջացած 7.036.666.312 ՀՀ դրամ մաքսատուրք և հարկ:
Սոնա Դավթյան
