Միավորված ազգերի կազմակերպության Անվտանգության խորհուրդը մտադիր է հուլիսի 21-ին կազմակերպել Ուկրաինայի տարածքում խոցված մալայզիական ինքնաթիռի գործը քննելու միջազգային տրիբունալի ստեղծման բանաձևի քվեարկությունը: Այս մասին հաղորդում է TASS գործակալությունը` հղում կատարելով ՄԱԿ-ում իր աղբյուրներին:
«Բանաձևի հեղինակներն ավարտել են աշխատանքը նախագծի վրա, այն այս պահին ունի վերջնական տեսք: Նախնական տվյալներով` քվեարկությունը նախատեսվում է հուլիսի 21-ին», — նշել է աղբյուրը:
Ըստ որոշ աղբյուրների` մալայզիական և հոլանդական կողմերի քննության արդյունքում պարզվել են փաստեր, որոնք վկայում են այն մասին, որ Ռուսաստանն անմիջական կապ է ունեցել այս հանցագործության հետ: Ռուսաստանը մերժում է ՄԱԿ-ի ԱԽ կողմից նման տրիբունալ ստեղծելու հնարավորությունը և վետո կկիրառի:
